47. සුද්ධිනිද්දෙසවණ්ණනා

455. දෙසනා සංවරො එට්ඨි, පච්චවෙක්ඛණ භෙදතොති (පාරා. අට්ඨ. 2.585; විසුද්ධි. 1.19) දෙසනාසුද්ධි සංවරසුද්ධි පරියෙට්ඨිසුද්ධි පච්චවෙක්ඛණසුද්ධීති එවං චතුබ්බිධා සුද්ධීති අත්ථො. ඉදානි තාහි සුද්ධීහි විසුජ්ඣනකෙ දස්සෙතුං ‘‘පාතිමොක්ඛසංවරසම්මත’’න්තිආදිමාහ.

456. ‘‘පුන එවං න කරිස්ස’’න්ති චිත්තාධිට්ඨානසංවරා යස්මා සුජ්ඣති ඉන්ද්‍රියසංවරො, තස්මා ඉන්ද්‍රියසංවරො ‘‘සංවරසුද්ධී’’ති වුත්තොති සම්බන්ධො.

457. පහායානෙසනන්ති අනෙසනං පහාය ධම්මෙන උප්පාදෙන්තස්ස පච්චයෙති පාඨසෙසො.

458. ‘‘පටිසඞ්ඛා යොනිසො චීවරං පටිසෙවාමි…පෙ… උප්පන්නානං වෙය්‍යාබාධිකානං…පෙ… පරමතායා’’ති (ම. නි. 1.23; අ. නි. 6.58) ච එවං චතූසුපි පච්චයෙසු යථාවුත්තපච්චවෙක්ඛණසුජ්ඣනාති අත්ථො. එත්ථ පන දුවිධං පච්චවෙක්ඛණං පටිලාභකාලෙ ච පරිභොගකාලෙ ච. පටිලාභකාලෙ හි ධාතුවසෙන වා පටික්කූලවසෙන වා පච්චවෙක්ඛිත්වා ඨපිතචීවරාදීනි තතො උත්තරි පරිභුඤ්ජන්තස්ස අනවජ්ජොව පරිභොගො, පරිභොගකාලෙපි. සුද්ධිවිනිච්ඡයො.

සුද්ධිනිද්දෙසවණ්ණනා නිට්ඨිතා.