31. විකප්පනානිද්දෙසවණ්ණනා

221. සම්මුඛායාති (පාචි. 374; පාරා. අට්ඨ. 2.469; කඞ්ඛා. අට්ඨ. විකප්පනසික්ඛාපදවණ්ණනා) සම්මුඛෙ ඨිතස්සාති අත්ථො. බ්‍යත්තස්සාති විකප්පනවිධානං පච්චුද්ධරණාදිවිධානඤ්ච ජානන්තස්ස. අබ්‍යත්තො පන ‘‘ඉමිනා මය්හං දින්න’’න්ති ගහෙත්වාපි ගච්ඡෙය්‍යාති අත්ථො. එකස්සාති එකස්ස භික්ඛුස්ස.

222. නිධෙතුංවාති නිධෙතුං එව, නිස්සග්ගියං න හොතීති අත්ථො. පරිභුඤ්ජිතුං වා විස්සජ්ජෙතුං වා අධිට්ඨාතුං වා න වට්ටතීති අත්ථො.

224-5. අපරා සම්මුඛා වාති සම්මුඛා විකප්පනා එවාති අත්ථො. ඉමා ද්වෙ විකප්පනා අත්තනා එව විකප්පෙත්වා පරෙන පච්චුද්ධරාපිතත්තා සම්මුඛා විකප්පනා එවාති වුත්තා.

227. මිත්තොති දළ්හමිත්තො. සන්දිට්ඨොති දිට්ඨමත්තො නාතිදළ්හමිත්තො. ‘‘ඉතරෙන ච පුබ්බෙ වුත්තනයෙන ‘තිස්සො භික්ඛූ’ති වා ‘තිස්සා භික්ඛුනී’ති වා වත්තබ්බං. පුන තෙන ‘අහං තිස්සස්ස භික්ඛුනො, තිස්සාය භික්ඛුනියා වා දම්මී’ති විකප්පෙත්වා තෙනෙව ‘තිස්සස්ස භික්ඛුනො, තිස්සාය භික්ඛුනියා සන්තකං පරිභුඤ්ජ වා විස්සජ්ජෙහි වා යථාපච්චයං වා කරොහී’ති පච්චුද්ධරිතබ්බ’’න්ති එවං පාඨො ගහෙතබ්බො.

228. දූරසන්තිකත්තෙකත්ත-බහුභාවං විජානියාති එත්ථ දූරත්තඤ්ච සන්තිකත්තඤ්ච එකත්තඤ්ච බහුභාවඤ්ච විජානිත්වාති අත්ථො.

229. ‘‘දසාහපරමං අතිරෙකචීවරං ධාරෙතබ්බ’’න්ති (පාරා. 462) වුත්තත්තා ‘‘දසාහං වා’’ති වුත්තං. ‘‘චීවරකාලසමයො නාම අනත්ථතෙ කථිනෙ වස්සානස්ස පච්ඡිමො මාසො, අත්ථතෙ කථිනෙ පඤ්ච මාසා’’ති (පාරා. 649) වුත්තත්තා ‘‘මාසමෙකං වා පඤ්ච වා’’ති වුත්තං, මාසං වා එකං පඤ්ච වා මාසෙති අත්ථො. ‘‘භික්ඛුනො පනෙව අකාලචීවරං උප්පජ්ජෙය්‍ය, ආකඞ්ඛමානෙන භික්ඛුනා පටිග්ගහෙතබ්බං. පටිග්ගහෙත්වා ඛිප්පමෙව කාරෙතබ්බං. නො චස්ස පාරිපූරි, මාසපරමං තෙන භික්ඛුනා තං චීවරං නික්ඛිපිතබ්බං ඌනස්ස පාරිපූරියා සතියා පච්චාසායා’’ති (පාරා. 499) වුත්තත්තා ‘‘පච්චාසා සති මාසක’’න්ති වුත්තං. නුප්පාදයතීති අනධිට්ඨිතං අවිකප්පිතං නිස්සග්ගිං න ජනයතීති අත්ථො. විකප්පනාවිනිච්ඡයො.

විකප්පනානිද්දෙසවණ්ණනා නිට්ඨිතා.