29. මිච්ඡාජීවවිවජ්ජනානිද්දෙසවණ්ණනා

209. චුණ්ණන්ති සිරීසචුණ්ණාදිකන්ති අත්ථො. මත්තිකාති පකතිමත්තිකා වා පඤ්චවණ්ණා වා සුද්ධා කුඞ්කුට්ඨආදිකා වා. කුලසඞ්ගහාති එතෙහි සඞ්ගහිතානං සන්තිකෙ ලාභාසාය කුලසඞ්ගහත්ථන්ති අත්ථො. එත්ථ පන ඉමෙහි සඞ්ගහිතානං සන්තිකෙ ‘‘කිඤ්චි ලභිස්සාමී’’ති සඞ්ඝිකං වා පුග්ගලිකං වා දාතුං න වට්ටති එව. ඉමිනා පන නයෙන ලද්ධං පඤ්චන්නම්පි සහධම්මිකානං න වට්ටති, මිච්ඡාජීවඤ්ච හොති.

210-211. ලාභාසාය දායකානං දාරකෙ උක්ඛිපිත්වා පරිභටභාවො පාරිභටකතා, තාය පාරිභටකතාය න ජීවයෙති සම්බන්ධො. සෙසෙසුපි එසෙව නයො. ඛෙත්තාදීසු පෙසිතස්ස ගමනං පහෙණකම්මං. සාසනප්පටිසාසනහරණං දූතකම්මං. පෙසිතස්ස ගෙහතො ගෙහගමනං ජඞ්ඝපෙසනියං. ලාභාසාය ලඤ්ජදානමනුප්පදානං. අඤ්ඤෙන වාපීති අඞ්ගවිජ්ජාදිනා.

212. විඤ්ඤත්තීති (පාරා. 515 ආදයො; පාරා. අට්ඨ. 2.515 ආදයො) අඤ්ඤාතකවිඤ්ඤත්ති. අනෙසනාති පුබ්බෙ වුත්තෙන පුප්ඵදානාදිනා පච්චයෙසනා. කුහනාදීහීති (විභ. 861; විභ. අට්ඨ. 861; මහානි. 87) කුහනා ලපනා නෙමිත්තකතා නිප්පෙසිකතා ලාභෙන ලාභං නිජිගීසනතාති ඉමෙහි පඤ්චහි වත්ථූහීති අත්ථො. මිච්ඡාජීවවිනිච්ඡයො.

මිච්ඡාජීවවිවජ්ජනානිද්දෙසවණ්ණනා නිට්ඨිතා.