50. විපස්සනානිද්දෙසො

විපස්සනාති –

471. නාමරූපං පරිග්ගය්හ, තතො තස්ස ච පච්චයං;

හුත්වා අභාවතොනිච්චා, උදයබ්බයපීළනා.

472. දුක්ඛා අවසවත්තිත්තා, අනත්තාති තිලක්ඛණං;

ආරොපෙත්වාන සඞ්ඛාරෙ, සම්මසන්තො පුනප්පුනං;

පාපුණෙය්‍යානුපුබ්බෙන, සබ්බසංයොජනක්ඛයන්ති.

නිගමනකථා

473. අධිසීලාධිචිත්තානං, අධිපඤ්ඤාය සික්ඛනා;

භික්ඛුකිච්චමතො ඛුද්දසික්ඛායං සමුදාහටා.

474. මහතො කිත්තිසද්දස්ස, යස්ස ලොකවිචාරිනො;

පරිස්සමො න සම්භොති, මාලුතස්සෙව නිච්චසො.

475. තෙන ධම්මසිරීකෙන, තම්බපණ්ණියකෙතුනා;

ථෙරෙන රචිතා ධම්මවිනයඤ්ඤුපසංසිතා.

476. එත්තාවතායං නිට්ඨානං, ඛුද්දසික්ඛා උපාගතා;

පඤ්චමත්තෙහි ගාථානං, සතෙහි පරිමාණතොති.

ඛුද්දසික්ඛා නිට්ඨිතා.

නමො තස්ස භගවතො අරහතො සම්මාසම්බුද්ධස්ස