3. විකාලගාමප්පවෙසනසික්ඛාපදවණ්ණනා

චාරිත්තෙති චාරිත්තසික්ඛාපදෙ. උපචාරන්ති දුතියලෙඩ්ඩුපාතං. අඤ්ඤං ගාමං ගච්ඡන්තානං පුන ආපුච්ඡනකිච්චං නත්ථීති උස්සාහං අප්පටිප්පස්සම්භෙත්වා අඤ්ඤං ගාමං ගච්ඡන්තානං ගාමසතම්පි හොතු, පුන ආපුච්ඡනකිච්චං නත්ථීති අත්ථො. තෙනාහ ‘‘සචෙ පනා’’තිආදි. උස්සාහන්ති ගාමප්පවිසනුස්සාහං. අන්තරාරාමාදීසු (පාචි. අට්ඨ. 515) න කෙවලං අනාපුච්ඡා ගච්ඡන්තස්සෙව, කායබන්ධනං අබන්ධිත්වා සඞ්ඝාටිං අපාරුපිත්වා ගච්ඡන්තස්සාපි අනාපත්ති. ආපදාසූති සීහො වා බ්‍යග්ඝො වා ආගච්ඡති, මෙඝො වා උට්ඨෙති, අඤ්ඤො වා කොචි උපද්දවො උප්පජ්ජති, අනාපත්ති. එවරූපාසු ආපදාසු බහිගාමතො අන්තොගාමං පවිසිතුං වට්ටති.

විකාලගාමප්පවෙසනසික්ඛාපදවණ්ණනා නිට්ඨිතා.