5. තලසත්තිකසික්ඛාපදවණ්ණනා

තලසත්තිකන්ති තලමෙව තලසත්තිකං. ‘‘පොථනසමත්ථට්ඨෙන සත්තික’’න්ති (වජිර. ටී. පාචිත්තිය 456) එකෙ. උච්චාරෙය්‍යාති උක්ඛිපෙය්‍ය. නපහරිතුකාමතාය දින්නත්තා දුක්කටන්ති එත්ථ පහරිතුකාමතාය පහරිතෙ පුරිමසික්ඛාපදෙන පාචිත්තියං. උච්චාරෙතුකාමතාය කෙවලං උග්ගිරණමත්තෙ කතෙ ඉමිනා පාචිත්තියං. ඉමිනා පන විරජ්ඣිත්වා පහාරො දින්නො, තස්මා දුක්කටං. එත්ථ පන ‘‘තිරච්ඡානගතාදීනං අසුචිකරණාදීනි දිස්වා කුජ්ඣිත්වාපි උග්ගිරන්තස්ස මොක්ඛාධිප්පායොයෙවා’’ති (සාරත්ථ. ටී. පාචිත්තිය 3.471) වදන්ති.

තලසත්තිකසික්ඛාපදවණ්ණනා නිට්ඨිතා.