6. ථෙය්යසත්ථසික්ඛාපදවණ්ණනා
රාජානං වා වඤ්චෙත්වාති රාජානං ථෙනෙත්වා රඤ්ඤො සන්තකං කිඤ්චි ගහෙත්වා, ‘‘ඉදානි තස්ස න දස්සාමා’’ති මග්ගප්පටිපන්නා අකතකම්මා චෙව කතකම්මා ච චොරාති වුත්තං හොති. එස නයො සුඞ්කං පරිහරිතුකාමාති එත්ථාපි.
කාලවිසඞ්කෙතෙනාති කාලස්ස විසඞ්කෙතෙන, දිවසවිසඞ්කෙතෙනාති වුත්තං හොති. මග්ගවිසඞ්කෙතෙන, පන අටවිවිසඞ්කෙතෙන වා ගච්ඡතො ආපත්තියෙව.
ථෙය්යසත්ථසික්ඛාපදවණ්ණනා නිට්ඨිතා.