7. නහානසික්ඛාපදවණ්ණනා

‘‘දියඩ්ඪො මාසො සෙසො ගිම්හාන’’න්ති ‘‘වස්සානස්ස පඨමො මාසො’’ඉච්චෙතෙ අඩ්ඪතෙය්‍යමාසා උණ්හසමයො, පරිළාහසමයොති ගිම්හානං සෙසො දියඩ්ඪො මාසො උණ්හසමයො, වස්සානස්ස පඨමො මාසො පරිළාහසමයොති එවං එතෙ අඩ්ඪතෙය්‍යමාසා කමෙන උණ්හසමයො, පරිළාහසමයො නාම හොතීති අත්ථො තෙනෙව පදභාජනියං ‘‘උණ්හසමයො නාම දියඩ්ඪො මාසො සෙසො ගිම්හාන’’න්ති, ‘‘පරිළාහසමයො නාම වස්සානස්ස පඨමො මාසො’’ති වුත්තං. යදා විනා නහානෙන න ඵාසු හොති, අයං ගිලානසමයො. පදභාජනියං (පාචි. 364) පන ගිලානෙ නිච්ඡිතෙ ගිලානකාලො නිච්ඡිතොව හොතීති ‘‘යස්ස විනා නහානෙන න ඵාසු හොති, ‘ගිලානසමයො’ති නහායිතබ්බ’’න්ති වුත්තං. පරිවෙණසම්මජ්ජනමත්තම්පීති අන්තමසො පරිවෙණසම්මජ්ජනමත්තම්පි.

වාලුකං උක්කිරිත්වාති සුක්ඛාය නදියා වාලිකං උත්තිරිත්වා. ආවාටෙසුපීති පි-සද්දෙන නදියං වත්තබ්බමෙව නත්ථීති දස්සෙති. ආපදාසූති භමරාදීහි අනුබන්ධෙසු.

නහානසික්ඛාපදවණ්ණනා නිට්ඨිතා.