7. මහානාමසික්ඛාපදවණ්ණනා

සබ්බඤ්චෙතං වත්ථුවසෙන වුත්තන්ති ‘‘අගිලානෙන භික්ඛුනා චතුමාසපච්චයපවාරණා සාදිතබ්බා අඤ්ඤත්‍ර පුනපවාරණාය අඤ්ඤත්‍ර නිච්චපවාරණායා’’ති (පාචි. 306) එතං සබ්බං සික්ඛාපදනිදානසඞ්ඛාතස්ස වත්ථුනො වසෙන වුත්තං. තත්ථ හි මහානාමෙන සක්කෙන ‘‘ඉච්ඡාමහං, භන්තෙ, සඞ්ඝං චතුමාසං භෙසජ්ජෙන පවාරෙතු’’න්තිආදිනා (පාචි. 303) උස්සන්නුස්සන්නෙන ච භෙසජ්ජෙන චතුමාසං පුන නිච්චං පවාරණා කතා, තස්මා භගවතා තස්ස වසෙන එවං වුත්තන්ති වුත්තං හොති. අඤ්ඤත්‍ර පුනපවාරණායාති යදි පුනපවාරණා අත්ථි, තං ඨපෙත්වා. අඤ්ඤත්‍ර නිච්චපවාරණායාති එත්ථාපි එසෙව නයො. යදි පන තාපි අත්ථි, සාදිතබ්බාවාති අධිප්පායො. තෙනාහ ‘‘අයං පනෙත්ථ අත්ථො’’තිආදි. තත්ථාති තිස්සං පවාරණායං. භෙසජ්ජෙහි වා පරිච්ඡෙදො කතො හොතීති ‘‘සප්පි තෙල’’න්ති එවමාදිනා නාමවසෙන වා ‘‘පත්ථෙන නාළියා ආළ්හකෙනා’’තිආදිනා පරිමාණවසෙන වා ‘‘එත්තකානි වා භෙසජ්ජානි විඤ්ඤාපෙතබ්බානී’’ති භෙසජ්ජෙහි පරිච්ඡෙදො කතො හොති. නභෙසජ්ජකරණීයෙති මිස්සකභත්තෙනාපි චෙ යාපෙතුං සක්කොති, නභෙසජ්ජකරණීයං නාම හොති. අඤ්ඤං භෙසජ්ජන්ති සප්පිනා පවාරිතො තෙලං, ආළ්හකෙන පවාරිතො දොණං.

යථාභූතං ආචික්ඛිත්වාති ‘‘ඉමෙහි තයා භෙසජ්ජෙහි පවාරිතම්හා, අම්හාකඤ්ච ඉමිනා ච ඉමිනා ච භෙසජ්ජෙන අත්ථො, යාසු තයා රත්තීසු පවාරිතම්හා, තා රත්තියො වීතිවත්තා, අම්හාකඤ්ච භෙසජ්ජෙන අත්ථො’’ති යථාභූතං ආරොචෙත්වා. එවඤ්ච විඤ්ඤාපෙතුං ගිලානොව ලභති, න ඉතරො.

මහානාමසික්ඛාපදවණ්ණනා නිට්ඨිතා.