1. අචෙලකසික්ඛාපදවණ්ණනා

අචෙලකස්සාති යස්ස කස්සචි පබ්බජ්ජාසමාපන්නස්ස නග්ගස්ස. පරිබ්බාජකස්සාති ඨපෙත්වා භික්ඛුඤ්ච සාමණෙරඤ්ච අවසෙසස්ස යස්ස කස්සචි පබ්බජ්ජාසමාපන්නස්ස. පරිබ්බාජිකායාති ඨපෙත්වා භික්ඛුනිං, සික්ඛමානං, සාමණෙරිඤ්ච අවසෙසාය යාය කායචි පබ්බජ්ජාසමාපන්නාය. එතෙ ච සබ්බෙ අඤ්ඤතිත්ථියා වෙදිතබ්බා. තෙනාහ ‘‘එතෙසං අචෙලකාදීනං අඤ්ඤතිත්ථියාන’’න්ති.

තෙසන්ති අඤ්ඤතිත්ථියානං. භාජනං නික්ඛිපිත්වාති ආමිසභරිතං භාජනං නික්ඛිපිත්වා. බාහිරාලෙපන්ති තෙලාදිං.

අචෙලකාදයො යස්මා, තිත්ථියාව මතා ඉධ;

තස්මා තිත්ථියනාමෙන, තිකච්ඡෙදො කතො තයො.

අතිත්ථියස්ස නග්ගස්ස, තථා තිත්ථියලිඞ්ගිනො;

ගහට්ඨස්සාපි භික්ඛුස්ස, කප්පතීති විනිච්ඡයො.

අතිත්ථියස්ස චිත්තෙන, තිත්ථියස්ස ච ලිඞ්ගිනො;

සොතාපන්නාදිනො දාතුං, කප්පතීතීධ නො මති.

අචෙලකසික්ඛාපදවණ්ණනා නිට්ඨිතා.