6. චීවරසිබ්බනසික්ඛාපදවණ්ණනා

සූචිං පවෙසෙත්වා පවෙසෙත්වා නීහරණෙති ආරාපථෙ ආරාපථෙ පාචිත්තියං. ‘‘සිබ්බිස්සාමී’’ති පන විචාරෙන්තස්ස, ඡින්දන්තස්සාපි දුක්කටං. සතක්ඛත්තුම්පි විජ්ඣිත්වා සකිං නීහරන්තස්සාති සකලසූචිං අනීහරන්තො දීඝසුත්තප්පවෙසනත්ථං සතක්ඛත්තුම්පි විජ්ඣිත්වා සකිං නීහරන්තස්ස. ‘‘සිබ්බා’’ති වුත්තොති සකිං ‘‘චීවරං සිබ්බා’’ති වුත්තො. නිට්ඨාපෙතීති සබ්බං සූචිකම්මං පරියොසාපෙති. තස්ස ආරාපථෙ ආරාපථෙ පාචිත්තියන්ති ආණත්තස්ස සූචිං පවෙසෙත්වා පවෙසෙත්වා නීහරණෙ එකමෙකං පාචිත්තියං.

උදායිත්ථෙරන්ති ලාළුදායිත්ථෙරං. වුත්තලක්ඛණං සිබ්බනං වා සිබ්බාපනං වාති ‘‘සූචිං පවෙසෙත්වා’’තිආදිනා වුත්තලක්ඛණං සිබ්බනං වා සිබ්බාපනං වා.

චීවරසිබ්බනසික්ඛාපදවණ්ණනා නිට්ඨිතා.