5. නිසීදනසික්ඛාපදවණ්ණනා

නිසීදනසන්ථතන්ති ‘‘නිසීදනං නාම සදසං වුච්චතී’’ති එත්ථ පදභාජනියං (පාරා. 568) වුත්තත්තා සදසං සන්ථතං, එත්ථ ච නිසීදනග්ගහණං සන්ථතෙ චීවරසඤ්ඤානිවාරණත්ථං, යතො තෙ භික්ඛූ කම්බලචීවරසඤ්ඤාය සන්ථතං ඡඩ්ඩෙත්වා ධුතඞ්ගානි සමාදියිංසු. සයනාසනප්පයොජනත්තා සන්ථතස්ස ‘‘පුරාණසන්ථතං නාමා’’තිආදි වුත්තං. යත්ථාති යස්මිං සන්ථතෙ. විදත්ථිමත්තන්ති සුගතවිදත්ථිමත්තං. උක්කට්ඨපරිච්ඡෙදො චායං ‘‘අනාපත්ති අලභන්තො ථොකතරං ආදියිත්වා කරොතී’’ති (පාරා. 570) පදභාජනෙ වුත්තත්තා. එකදෙසෙති ඉදානි කත්තබ්බනවසන්ථතස්ස එකප්පදෙසෙ. විජටෙත්වාති විද්ධංසෙත්වා. අනාදාති ය-කාරලොපෙනායං නිද්දෙසොති ආහ ‘‘සති පුරාණසන්ථතෙ අග්ගහෙත්වා’’ති.

එත්ථ ච ‘‘ඉදං මෙ, භන්තෙ, නිසීදනසන්ථතං අනාදියිත්වා පුරාණසන්ථතස්ස සාමන්තා සුගතවිදත්ථිං කාරාපිතං නිස්සග්ගිය’’න්ති (පාරා. 568) ඉමිනා නයෙන නිස්සජ්ජනවිධානං වෙදිතබ්බං. සන්ථතවිස්සජ්ජනවත්ථුස්මිං පඤ්ඤත්තන්ති භගවතා සන්ථතානි විප්පකිණ්ණානි දිස්වා ‘‘සද්ධාදෙය්‍යවිනිපාතනෙ කාරණං නත්ථි, පරිභොගුපායං නෙසං දස්සෙස්සාමී’’ති (පාරා. අට්ඨ. 2.566) සන්ථතවිස්සජ්ජනවත්ථුස්මිං පඤ්ඤත්තං. කිරියාකිරියත්තා ඉමස්ස සික්ඛාපදස්ස ‘‘සෙසං තතියසදිසමෙවා’’ති වුත්තං, ද්වෙභාගසික්ඛාපදසදිසමෙවාති අත්ථො. අයං පන විසෙසො – පුරාණසන්ථතස්ස සාමන්තා සුගතවිදත්ථියා ආදාය කරණෙ, අලභන්තස්ස ථොකතරං ආදාය කරණෙ, සබ්බථා අලභන්තස්ස අනාදාය කරණෙ ච අනාපත්තීති. අඞ්ගෙසු පනෙත්ථ පඨමඞ්ගපුරාණසන්ථතස්ස සාමන්තා සුගතවිදත්ථිඅනාදියනාති දට්ඨබ්බං.

නිසීදනසික්ඛාපදවණ්ණනා නිට්ඨිතා.