2. සුද්ධකාළකසික්ඛාපදවණ්ණනා

කාළකානන්ති සභාවෙන වා රජනෙන වා කාළකානං. යථාහ ‘‘කාළකං නාම ද්වෙ කාළකානි ජාතියා කාළකං වා රජනකාළකං වා’’ති. අඤ්ඤෙහි අමිස්සිතානන්ති අඤ්ඤෙහි අමිස්සිතකාළකානන්ති අත්ථො. ‘‘යථා පඨමෙ ‘එකෙනාපි කොසියංසුනා’ති (කඞ්ඛා. අට්ඨ. කොසියසික්ඛාපදවණ්ණනා) වුත්තං, තථා ඉධාපි ‘එකෙනාපි අඤ්ඤෙන අමිස්සෙත්වා’ති අවුත්තත්තා අඤ්ඤෙන පන මිස්සකභොගෙපි අපඤ්ඤායමානරූපකං චෙ ‘සුද්ධකාළක’මිච්චෙව වුච්චතී’’ති (වජිර. ටී. පාරාජික 547) වදන්ති.

එත්ථ ච ‘‘ඉදං මෙ, භන්තෙ, සුද්ධකාළකානං එළකලොමානං සන්ථත’’න්තිආදිනා (පාරා. 549) නිස්සජ්ජනවිධානං වෙදිතබ්බං. සෙසන්ති පුබ්බපයොගදුක්කටචතුක්කපාචිත්තියාදිකං. අඞ්ගෙසු පන ‘‘සුද්ධකාළකභාවො’’ති අයං විසෙසො.

සුද්ධකාළකසික්ඛාපදවණ්ණනා නිට්ඨිතා.