7. අපරිහානියසුත්තවණ්ණනා

37. සත්තමෙ නිබ්බානසන්තිකෙයෙව චරතීති කිලෙසනිබ්බානස්ස අනුපාදාපරිනිබ්බානස්ස ච සන්තිකෙයෙව චරති ‘‘න චිරස්සෙව අධිගමිස්සතී’’ති කත්වා. ගාථාය අප්පමාදරතොති සමථවිපස්සනාය අප්පමජ්ජනෙ රතො අභිරතො, අප්පමාදෙනෙව රත්තින්දිවං වීතිනාමෙන්තොති අත්ථො. පමාදං භයතො පස්සන්තොති නිරයූපපත්තිආදිභයහෙතුතො පමාදං භයතො පස්සන්තො. අභබ්බො පරිහානායාති සො එවරූපො සමථවිපස්සනාධම්මෙහි මග්ගඵලෙහි වා පරිහානාය අභබ්බො. සමථවිපස්සනාතො හි සම්පත්තතො න පරිහායති, ඉතරානි ච අප්පත්තානි පාපුණාතීති.

අපරිහානියසුත්තවණ්ණනා නිට්ඨිතා.