9. භික්ඛුනීසුත්තවණ්ණනා
159. නවමෙ එවං පවත්තං පච්චුප්පන්නතණ්හං නිස්සායාති ‘‘කුදාස්සු නාමාහම්පි ආසවානං ඛයා’’තිආදිනා නයෙන අනුත්තරෙ විමොක්ඛෙ පිහං උප්පාදෙන්තස්ස උප්පන්නතණ්හං නිස්සාය. කථං පන ලොකුත්තරධම්මෙ ආරබ්භ ආසා උප්පජ්ජතීති? න ඛො පනෙතං එවං දට්ඨබ්බං, න ආරම්මණකරණවසෙන තත්ථ පිහා පවත්තති අවිසයත්තා පුග්ගලස්ස ච අනධිගතභාවතො. අනුස්සවූපලද්ධෙ පන අනුත්තරවිමොක්ඛෙ උද්දිස්ස පිහං උප්පාදෙන්තො තත්ථ පිහං උප්පාදෙති නාම. නාකඩ්ඪතීති කම්මපථභාවං අප්පත්තතාය පටිසන්ධිං න දෙති. සෙසං සුවිඤ්ඤෙය්‍යමෙව.
භික්ඛුනීසුත්තවණ්ණනා නිට්ඨිතා.