10. සුගතවිනයසුත්තවණ්ණනා

160. දසමෙ වළඤ්ජෙන්තීති සජ්ඣායන්ති චෙව වාචුග්ගතං කරොන්තා ධාරෙන්ති ච. අවිගතතණ්හතාය තං තං පරික්ඛාරජාතං බහුම්පි ආදියන්තීති බහුලා, තෙ එව බාහුලිකා යථා ‘‘වෙනයිකො’’ති (ම. නි. 1.246; අ. නි. 8.11; පාරා. 8). තෙ පන යස්මා පච්චයබහුලභාවා යුත්තප්පයුත්තා නාම හොන්ති, තස්මා ආහ ‘‘පච්චයබාහුල්ලාය පටිපන්නා’’ති. සිථිලං ගණ්හන්තීති සාථලිකා, සික්ඛාය ආදරගාරවාභාවෙන සිථිලං අදළ්හං ගණ්හන්තීති අත්ථො. සිථිලන්ති ච භාවනපුංසකනිද්දෙසො, සිථිල-සද්දෙන වා සමානත්ථස්ස සාථලසද්දස්ස වසෙන සාථලිකාති පදසිද්ධි වෙදිතබ්බා. අවගමනතොති අධොගමනතො, ඔරම්භාගියභාවතොති අත්ථො. නිබ්බීරියාති උජ්ඣිතුස්සාහා තදධිගමාය ආරම්භම්පි අකුරුමානා.

සුගතවිනයසුත්තවණ්ණනා නිට්ඨිතා.

ඉන්ද්‍රියවග්ගවණ්ණනා නිට්ඨිතා.