6. සාළ්හසුත්තවණ්ණනා
67. ඡට්ඨෙ පාතො අසිතබ්බභොජනං පාතරාසං, භුත්තං පාතරාසං එතෙසන්ති භුත්තපාතරාසා. දාසා නාම අන්තොජාතා වා ධනක්කීතා වා කරමරානීතා වා සයං වා දාසබ්‍යං උපගතා. භත්තවෙතනභතා කම්මකාරා නාම.
නිච්ඡාතොති එත්ථ ඡාතං වුච්චති තණ්හා ජිඝච්ඡාහෙතුතාය, සා අස්ස නත්ථීති නිච්ඡාතො. තෙනාහ ‘‘නිත්තණ්හො’’ති. අබ්භන්තරෙ සන්තාපකරානං කිලෙසානන්ති අත්තනො සන්තානෙ දරථපරිළාහජනනෙන සන්තාපනකිලෙසානං. අන්තොතාපනකිලෙසානං අභාවා සීතො සීතලො භූතො ජාතොති සීතිභූතො. තෙනාහ ‘‘සීතලීභූතො’’ති. මග්ගඵලනිබ්බානසුඛානි වා පටිසංවෙදෙතීති සුඛප්පටිසංවෙදී. සෙසං සුවිඤ්ඤෙය්‍යමෙව.
සාළ්හසුත්තවණ්ණනා නිට්ඨිතා.