2. භයසුත්තවණ්ණනා

63. දුතියෙ පරිත්තාතුං සමත්ථභාවෙනාති උප්පන්නභයතො රක්ඛිතුං සමත්ථභාවෙන. නත්ථි එත්ථ මාතාපුත්තං අඤ්ඤමඤ්ඤං තායිතුං සමත්ථන්ති අමාතාපුත්තානි, තානියෙව අමාතාපුත්තිකානි. තෙනාහ ‘‘නත්ථි එත්ථා’’තිආදි. යන්ති භුම්මත්ථෙ උපයොගවචනන්ති ආහ ‘‘යස්මිං සමයෙ’’ති. මාතාපි පුත්තං පස්සිතුං න ලභති, පරිත්තාතුං න සමත්ථන්ති අධිප්පායො. පුත්තොපි මාතරන්ති එත්ථාපි එසෙව නයො. චිත්තුත්‍රාසොයෙව භයං චිත්තුත්‍රාසභයං. ඉමිනා ඔත්තප්පභයාදිං නිවත්තෙති. අටවිග්ගහණෙන අටවිවාසිනො වුත්තා ‘‘සබ්බො ගාමො ආගතො’’තිආදීසු වියාති ආහ ‘‘අටවීති චෙත්ථ අටවිවාසිනො චොරා වෙදිතබ්බා’’ති. එතෙති අටවිවාසිනො චොරා. එතං වුත්තන්ති ‘‘අටවිසඞ්කොපො’’ති ඉදං වුත්තං. ඨානගමනාදිඉරියාපථචක්කසමඞ්ගිනො ඉරියාපථචක්කසමාරුළ්හා නාම හොන්තීති ආහ ‘‘ඉරියාපථචක්කම්පි වට්ටතී’’ති. ඉරියාපථොයෙව පවත්තනට්ඨෙන චක්කන්ති ඉරියාපථචක්කං.

පරියායන්තීති පරිතො තෙන තෙන දිසාභාගෙන ගච්ඡන්ති. තෙනාහ ‘‘ඉතො චිතො ච ගච්ඡන්තී’’ති. මාතුපෙමෙන ගන්තුං අවිසහිත්වා අත්තනො සන්තිකං ආගච්ඡන්තං. අත්තසිනෙහස්ස බලවභාවතො මාතරම්පි අනපෙක්ඛිත්වා ‘‘අත්තානංයෙව රක්ඛිස්සාමී’’ති ගච්ඡන්තං. එකස්මිං ඨානෙ නිලීනන්ති වුත්තනයෙනෙව ගන්ත්වා එකස්මිං ඛෙමෙ පදෙසෙ නිසින්නං. කුල්ලෙ වාතිආදීසු කූලං පරතීරං වහති පාපෙතීහි කුල්ලො, තරණත්ථාය වෙළුනළාදීහි කලාපං කත්වා බද්ධො. පත්ථරිත්වා බද්ධො පන උළුම්පො, චාටිආදි මත්තිකාභාජනං. වුය්හමානන්ති උදකොඝෙන අධොසොතං නීයමානං.

යථාවුත්තානි තීණි භයානි සමාතාපුත්තිකානියෙව අස්සුතවතො පුථුජ්ජනස්ස වසෙන අමාතාපුත්තිකානි දස්සිතානීති ආහ ‘‘එවං පරියායතො අමාතාපුත්තිකානි භයානි දස්සෙත්වා’’ති.

භයසුත්තවණ්ණනා නිට්ඨිතා.