5-10. කෙසකම්බලසුත්තාදිවණ්ණනා

138-143. පඤ්චමෙ තන්තාවුතානං වත්ථානන්ති ඉදං ‘‘යානි කානිචී’’ති ඉමිනා සමානාධිකරණන්ති ආහ ‘‘පච්චත්තෙ සාමිවචන’’න්ති. වායිතානන්ති වීතානං. ලාමකොති නිහීනො, මක්ඛලි මොඝපුරිසොති එත්ථ මක්ඛලීති තස්ස නාමං. තං කිර සකද්දමාය භූමියා තෙලඝටං ගහෙත්වා ගච්ඡන්තං, ‘‘තාත, මා ඛලී’’ති සාමිකො ආහ. සො පමාදෙන ඛලිත්වා පතිත්වා සාමිකස්ස භයෙන පලායිතුං ආරද්ධො. සාමිකො උපධාවිත්වා නං දුස්සකණ්ණෙ අග්ගහෙසි, සාටකං ඡඩ්ඩෙත්වා අචෙලකො හුත්වා පලායි. සො පණ්ණෙන වා තිණෙන වා පටිච්ඡාදෙතුම්පි අජානන්තො ජාතරූපෙනෙව එකං ගාමං පාවිසි. මනුස්සා තං දිස්වා ‘‘අයං සමණො අරහා අප්පිච්ඡො, නත්ථි ඉමිනා සදිසො’’ති පූවභත්තාදීනි ගහෙත්වා උපසඞ්කමන්ති. සො ‘‘මය්හං සාටකං අනිවත්ථභාවෙන ඉදං උප්පන්න’’න්ති තතො පට්ඨාය සාටකං ලභිත්වාපි න නිවාසෙසි, තදෙව ච පබ්බජ්ජං අග්ගහෙසි. තස්ස සන්තිකෙ අඤ්ඤෙපි අඤ්ඤෙපීති පඤ්චසතා මනුස්සා පබ්බජිංසු. තං සන්ධායාහ ‘‘මක්ඛලි මොඝපුරිසො’’ති. ඡට්ඨාදීනි උත්තානත්ථානි එව.

කෙසකම්බලසුත්තාදිවණ්ණනා නිට්ඨිතා.