පඤ්චමො පරිච්ඡෙදො

5. භූමිපුග්ගලකථා

180. ඉතො පරං පවක්ඛාමි, භූමිපුග්ගලභෙදතො;

චිත්තානං පන සබ්බෙසං, කමතො සඞ්ගහං කථං.

181. නිරයඤ්ච තිරච්ඡානයොනි පෙතාසුරා තථා;

චතුරාපායභූමීති, කාමෙ දුග්ගතියො මතා.

182. චාතුමහාරාජිකා ච, තාවතිංසා ච යාමකා;

තුසිතා චෙව නිම්මානරතිනො වසවත්තිනො.

183. ඡළෙතෙ දෙවලොකා ච, මානවාති ච සත්තධා;

කාමසුගතියො චෙකාදසධා කාමභූමියො.

184. බ්‍රහ්මානං පාරිසජ්ජා ච, තථා බ්‍රහ්මපුරොහිතා;

මහාබ්‍රහ්මා ච තිවිධා, පඨමජ්ඣානභූමියො.

185. පරිත්තාභාප්පමාණාභා, තථෙවාභස්සරාති ච;

දුතියජ්ඣානභූමි ච, තිවිධාව පකාසිතා.

186. පරිත්තසුභාප්පමාණාසුභා ච සුභකිණ්හකා;

තිවිධාපි පවුච්චන්ති, තතියජ්ඣානභූමියො.

187. වෙහප්ඵලා අසඤ්ඤී ච, සුද්ධාවාසා ච පඤ්චධා;

ඉච්චෙතා පන සත්තාපි, චතුත්ථජ්ඣානභූමියො.

188. අවිහා ච අතප්පා ච, සුදස්සා ච සුදස්සිනො;

අකනිට්ඨාති පඤ්චෙතෙ, සුද්ධාවාසා පකාසිතා.

189. ඉති සොළසධා භින්නා, බ්‍රහ්මලොකා පවුච්චරෙ;

රූපිබ්‍රහ්මානමාවාසා, රූපාවචරභූමියො.

190. ආකාසානඤ්චායතනනාමාදීහි පකාසිතා;

අරූපිබ්‍රහ්මලොකා ච, චතුධාරූපභූමියො.

191. සොතාපන්නාදිභෙදෙන, චතුධානුත්තරා මතා;

පඤ්චතිංස පනිච්චෙවං, සබ්බථාපි ච භූමියො.

192. ජායන්ති චතුරාපායෙ, පාපපාකාය සන්ධියා;

කාමාවචරදෙවෙසු, මහාපාකෙහි ජායරෙ.

193. අහෙතුකා පුඤ්ඤපාකාහෙතුකෙන තු ජායරෙ;

භුම්මදෙවමනුස්සෙසු, මහාපාකෙහි චෙතරෙ.

194. විපාකං පඨමජ්ඣානං, පඨමජ්ඣානභූමියං;

දුතියං තතියඤ්චෙව, දුතියජ්ඣානභූමියං.

195. තතියම්හි චතුත්ථං තු, චතුත්ථම්හි ච පඤ්චමං;

ආරුප්පා ච කමෙනෙව, ආරුප්පෙ හොන්ති සන්ධියො.

196. කායවාචාමනොද්වාරෙ, කම්මං පාණවධාදිකං;

කත්වා පාපකචිත්තෙහි, ජායන්තාපායභූමියං.

197. කායවාචාමනොද්වාරෙ, දානං සීලඤ්ච භාවනං;

කාමපුඤ්ඤෙහි කත්වාන, කාමසුගතියං සියුං.

198. පරිත්තං මජ්ඣිමං ඣානං, පණීතඤ්ච යථාක්කමං;

භාවෙත්වා තිවිධා හොන්ති, තීසු භූමීසු යොගිනො.

199. වෙහප්ඵලෙසු ජායන්ති, භාවෙත්වා පඤ්චමං තථා;

සඤ්ඤාවිරාගතඤ්චෙව, භාවෙත්වාසඤ්ඤිභූමියං.

200. සුද්ධාවාසෙසු ජායන්ති, අනාගාමිකපුග්ගලා;

ආරුප්පානි ච භාවෙත්වා, අරූපෙසු යථාක්කමං.

201. ලොකුත්තරං තු භාවෙත්වා, යථාසකමනන්තරං;

සමාපත්තික්ඛණෙ චෙව, අප්පෙති ඵලමානසං.

202. අපායම්හා චුතා සත්තා, කාමධාතුම්හි ජායරෙ;

සබ්බට්ඨානෙසු ජායන්ති, කාමසුගතිතො චුතා.

203. චුතා ජායන්ති රූපම්හා, සබ්බත්ථාපායවජ්ජිතෙ;

කාමසුගතියං හොන්ති, අරූපාසඤ්ඤතො චුතා.

204. තථාරූපචුතා හොන්ති, තත්ථෙවොපරිමෙව ච;

වට්ටමූලසමුච්ඡෙදා, නිබ්බායන්ති අනාසවා.

205. සුද්ධාවාසෙස්වනාගාමි-පුග්ගලාවොපපජ්ජරෙ;

කාමධාතුම්හි ජායන්ති, අනාගාමිවිවජ්ජිතා.

206. හෙට්ඨුපපත්තිබ්‍රහ්මානං, අරියානං න කත්ථචි;

අසඤ්ඤසත්තාපායෙසු, නත්ථෙවාරියපුග්ගලා.

207. වෙහප්ඵලෙ අකනිට්ඨෙ, භවග්ගෙ ච පතිට්ඨිතා;

න පුනාඤ්ඤත්ථ ජායන්ති, සබ්බෙ අරියපුග්ගලා.

208. ඡසු දෙවෙස්වනාගාමී, වීතරාගා න තිට්ඨරෙ;

න චිරට්ඨායිනො තත්ථ, ලොකියාපි ච යොගිනො.

209. ගිහිලිඞ්ගෙ න තිට්ඨන්ති, මනුස්සෙසු අනාසවා;

පබ්බජ්ජායඤ්ච භුම්මෙ ච, බ්‍රහ්මත්තෙපි ච තිට්ඨරෙ.

210. යානි පඤ්ඤාස වස්සානි,

මනුස්සානං ස පිණ්ඩිතො;

එකො රත්තිදිවො තෙන,

මාසෙකො තිංස රත්තියො.

211. ද්වාදසමාසියො වස්සො, තෙන පඤ්චසතං භවෙ;

චාතුමහාරාජිකානං, පමාණමිදමායුනො.

212. තං නවුතිවස්සසත-සහස්සං පන පිණ්ඩිතං;

ගණනාය මනුස්සානං, චතුභාගූපරූපරි.

213. යං මනුස්සවස්සසතං, තදෙකො දිවසො කතො;

තෙන වස්සසහස්සායු, තාවතිංසෙසු දෙසිතො.

214. කොටිත්තයං සට්ඨිසතසහස්සඤ්චාධිකං භවෙ;

ගණනාය මනුස්සානං, තාවතිංසෙසු පිණ්ඩිතං.

215. ආයුප්පමාණමිච්චෙවං, දෙවානමුපරූපරි;

ද්වික්ඛත්තුං ද්විගුණං කත්වා, චතුභාගමුදාහටං.

216. ගණනාය මනුස්සානං, තත්ථ චුද්දස කොටියො;

චත්තාලීසසතසහස්සාධිකා යාමභූමියං.

217. තුසිතානං පකාසෙන්ති, සත්තපඤ්ඤාස කොටියො;

සට්ඨිසතසහස්සානි, වස්සානි අධිකානි ච.

218. නිම්මානරතිදෙවානං, ද්විසතං තිංස කොටියො;

චත්තාලීසවස්සසතසහස්සානි ච සබ්බථා.

219. නවකොටිසතඤ්චෙකවීසතිවස්සකොටියො;

සට්ඨිවස්සසතසහස්සාධිකා වසවත්තිසු.

220. කප්පස්ස තතියො භාගො, උපඩ්ඪඤ්ච යථාක්කමං;

කප්පෙකො ද්වෙ ච චත්තාරො, අට්ඨ කප්පා ච සොළස.

221. ද්වත්තිංස චතුසට්ඨී ච, නවසු බ්‍රහ්මභූමිසු;

වෙහප්ඵලා අසඤ්ඤී ච, පඤ්චකප්පසතායුකා.

222. කප්පසහස්සං ද්වෙ චත්තාරි, අට්ඨ සොළස චක්කමා;

සහස්සානි ච කප්පානං, සුද්ධාවාසානමුද්දිසෙ.

223. වීසකප්පසහස්සානි, චත්තාලීසඤ්ච සට්ඨි ච;

චතුරාසීතිසහස්සා, කප්පා චාරුප්පකෙ කමා.

224. ආයුප්පමාණනියමො, නත්ථි භුම්මෙ ච මානවෙ;

වස්සානං ගණනා නත්ථි, චතුරාපායභූමියං.

225. පුථුජ්ජනාරියා චෙති, දුවිධා හොන්ති පුග්ගලා;

තිහෙතුකාදිභෙදෙන, තිවිධා ච පුථුජ්ජනා.

226. මග්ගට්ඨා ච ඵලට්ඨා ච,

අට්ඨෙවාරියපුග්ගලා;

ආදිතො සත්ත සෙක්ඛා ච,

අසෙක්ඛො චාරහාපරො.

227. අහෙතුකාව ලබ්භන්ති, සත්තා දුග්ගතියං පන;

තිහෙතුකාව ලබ්භන්ති, රූපාරූපෙ සචිත්තකා.

228. කාමාවචරදෙවෙසු, අහෙතුකවිවජ්ජිතා;

විනිපාතාසුරෙ චෙව, මානවෙ ච තයොපි ච.

229. අරියා නාම ලබ්භන්ති, අසඤ්ඤාපායවජ්ජිතෙ;

පුථුජ්ජනා තු ලබ්භන්ති, සුද්ධාවාසවිවජ්ජිතෙ.

230. සුද්ධාවාසමපායඤ්ච, හිත්වාසඤ්ඤිභවං තිධා;

සොතාපන්නාදයො ද්වෙපි, සෙසට්ඨානෙසු ලබ්භරෙ.

231. ඉති සබ්බප්පභෙදෙන, භූමිපුග්ගලසඞ්ගහං;

ඤත්වා විඤ්ඤූ විභාවෙය්‍ය, තත්ථ චිත්තානි සම්භවාති.

ඉති චිත්තවිභාගෙ භූමිපුග්ගලකථා නිට්ඨිතා.

පඤ්චමො පරිච්ඡෙදො.