ඡට්ඨො පරිච්ඡෙදො

6. භූමිපුග්ගලචිත්තප්පවත්තිකථා

232. කාමසුගතියං හොන්ති, මහාපාකා යථාරහං;

මහග්ගතවිපාකා ච, යථාසන්ධිවවත්ථිතා.

233. වොට්ඨබ්බකාමපුඤ්ඤානි, වියුත්තානි ච දිට්ඨියා;

උද්ධච්චසහිතඤ්චෙති, හොන්ති සබ්බත්ථ චුද්දස.

234. සන්තීරණමනොධාතු-චක්ඛුසොතමනා පන;

දස චිත්තානි ජායන්ති, සබ්බත්ථාරූපවජ්ජිතෙ.

235. දිට්ඨිගතසම්පයුත්තා, විචිකිච්ඡායුතා තථා;

පඤ්ච සබ්බත්ථ ජායන්ති, සුද්ධාවාසවිවජ්ජිතෙ.

236. දොසමූලද්වයඤ්චෙව, ඝානාදිත්තයමානසා;

අට්ඨ සබ්බත්ථ ජායන්ති, මහග්ගතවිවජ්ජිතෙ.

237. චතුත්ථාරුප්පජවනං, අනාගාමිඵලාදයො;

මහාක්‍රියා ච ජායන්ති, තෙරසාපායවජ්ජිතෙ.

238. හෙට්ඨාරුප්පජවා ද්වෙ ද්වෙ, ඡාපායුපරිවජ්ජිතෙ;

සිතරූපජවා හොන්ති, අරූපාපායවජ්ජිතෙ.

239. සොතාපත්තිඵලාදීනි, සුද්ධාපායවිවජ්ජිතෙ;

පඨමානුත්තරං සුද්ධා-පායාරූපවිවජ්ජිතෙ.

240. අවත්ථාභූමිභූතත්තා, න ගය්හන්ති අනුත්තරා;

එකවොකාරභූමි ච, රූපමත්තා න ගය්හති.

241. සභුම්මා සබ්බභුම්මා ච, එකද්විත්තයවජ්ජිතා;

තථාරූපසුද්ධාවාස-බ්‍රහ්මාපායවසාති ච.

242. මානසා පඤ්ච කොට්ඨාසා, සත්තරස චතුද්දස;

ඡත්තිංසතෙකවීසා ච, එකඤ්චෙව යථාක්කමං.

243. අට්ඨාරසාපි හොන්තෙතෙ, නවධාපි පුනෙකධා;

චතුධා තිවිධා චෙව, එකධාති ච භෙදතො.

244. තෙරසාපි ච කොට්ඨාසා, භවන්තෙකතිභූමකා;

ඡසත්තෙකාදසසත්ත-රසභූමකමානසා.

245. එකද්වයතිචතුක්කපඤ්චකාධිකවීසජා;

ඡබ්බීසතිංසජා චෙති, යථානුක්කමතො භවෙ.

246. චත්තාරි පුන චත්තාරි, එකමට්ඨට්ඨ චෙකකං;

චත්තාරෙකාදස ද්වෙ ද්වෙ, සත්ත තෙවීස චුද්දස.

247. ක්‍රියාජවමහාපාකා, ලොකුත්තරමහග්ගතා;

ද්වෙපඤ්ඤාස න ලබ්භන්ති, චතුරාපායභූමියං.

248. කාමාවචරදෙවෙසු, ඡසු භුම්මෙ ච මානවෙ;

කාමසුගතියං නත්ථි, නව පාකා මහග්ගතා.

249. දොසමූලමහාපාකා, ඝානාදිත්තයමානසා;

නත්ථාරූපවිපාකා ච, වීසතී රූපභූමියං.

250. කඞ්ඛාදිට්ඨියුතා පඤ්චාරූපපාකා චතුබ්බිධා;

පඤ්චාදොනුත්තරා චෙව, සුද්ධාවාසෙ න ලබ්භරෙ.

251. ආදාවජ්ජනමග්ගා ච, පටිඝාරූපමානසා;

කාමපාකා සිතාරූපෙ, තෙචත්තාලීස නත්ථි තෙ.

252. සත්තතිංස පරිත්තා ච, ලබ්භන්තාපායභූමියං;

මානසාසීති ලබ්භන්ති, කාමසුගතියං පන.

253. එකූනසත්තති රූපෙ, සුද්ධෙ පඤ්ඤාස පඤ්ච ච;

ඡචත්තාලීස ආරුප්පෙ, නත්ථාසඤ්ඤීසු කිඤ්චිපි.

254. ඉත්ථමෙකද්විතිචතුපඤ්චභුම්මානි සොළස;

දස පඤ්චදසෙවාථ, චතුත්තිංස චතුද්දස.

255. අපායාහෙතුකානං තු, මහාපාකක්‍රියාජවෙ;

හිත්වා සෙසපරිත්තානි, චිත්තානි පන ලබ්භරෙ.

256. ද්විහෙතුකාහෙතුකානං, සෙසානං කාමමානසා;

ලබ්භන්ති පන හිත්වාන, ඤාණපාකක්‍රියාජවෙ.

257. තිහෙතුකානං සත්තානං, තත්ථ තත්ථූපපත්තියං;

තත්ථ තත්ථූපපන්නානං, ලබ්භමානානි ලබ්භරෙ.

258. තිහෙතුකානං සබ්බෙපි, මානසාපායපාණිනං;

සත්තතිංසාවසෙසානං, එකතාලීස නිද්දිසෙ.

259. පුථුජ්ජනාන සෙක්ඛානං, න සන්ති ජවනක්‍රියා;

න සන්ති වීතරාගානං, පුඤ්ඤාපුඤ්ඤානි සබ්බථා.

260. කඞ්ඛාදිට්ඨියුතා පඤ්ච, සෙක්ඛානං නත්ථි මානසා;

දොසමූලද්වයඤ්චාපි, නත්ථානාගාමිනො පන.

261. වවත්ථිතාරියෙස්වෙව, යථාසකමනුත්තරා;

මග්ගට්ඨානං සකො මග්ගො, නත්ථඤ්ඤං කිඤ්චි සබ්බථා.

262. පුථුජ්ජනානං ද්වින්නම්පි, ඵලට්ඨානං යථාක්කමං;

තතියස්ස ඵලට්ඨස්ස, චතුත්ථස්ස ච සම්භවා.

263. තෙසට්ඨි චෙව චිත්තානි, ලබ්භන්තෙකූනසට්ඨි ච;

සත්තපඤ්ඤාස චිත්තානි, තෙපඤ්ඤාස ච සබ්බථා.

264. චතුපඤ්ඤාස පඤ්ඤාස, පඤ්ඤාසද්වයහීනකා;

කාමෙසු තෙසං සම්භොන්ති, චතුතාලීස චක්කමා.

265. තෙචත්තාලීස චෙකූනචත්තාලීස යථාක්කමං;

භවන්තෙකූනතාලීස, පඤ්චත්තිංස ච රූපිසු.

266. සත්තවීස ච තෙවීස, තෙවීස ච යථාක්කමං;

ආරුප්පෙසුපි ලබ්භන්ති, තෙසමට්ඨාරසෙව ච.

267. පුථුජ්ජනා ච චත්තාරො, අපායාහෙතුකාදයො;

අරියා චෙව අට්ඨාති, ද්වාදසන්නං වසා සියුං.

268. ඡබ්බිධා චිත්තකොට්ඨාසා, එකපුග්ගලිකා තථා;

චතුපඤ්චඡසත්තට්ඨ-පුග්ගලට්ඨාති චක්කමා.

269. ඡබ්බීස චුද්දසෙවාථ, තෙරස ද්වෙ ච මානසා;

දස සත්තාධිකා චෙව, පුන සත්තාධිකා දසාති.

ඉති චිත්තවිභාගෙ භූමිපුග්ගලචිත්තප්පවත්තිකථා නිට්ඨිතා.

ඡට්ඨො පරිච්ඡෙදො.