සත්තමො පරිච්ඡෙදො

270. ද්විහෙතුකාහෙතුකානං, න සම්පජ්ජති අප්පනා;

අරහත්තඤ්ච නත්ථීති, නත්ථෙව ජවනක්‍රියා.

271. ඤාණපාකා න වත්තන්ති, ජළත්තා මූලසන්ධියා;

ද්විහෙතුකතදාලම්බං, සියා සුගතියං න වා.

272. තිහෙතුකානං සත්තානං, සමථඤ්ච විපස්සනං;

භාවෙන්තානං පවත්තන්ති, ඡබ්බීසතිපි අප්පනා.

273. අරහන්තාන සත්තානං, භවන්ති ජවනක්‍රියා;

යථාභූමිනියාමෙන, ඤාණපාකා ච ලබ්භරෙ.

274. වජ්ඣා පඨමමග්ගෙන, කඞ්ඛාදිට්ඨියුතා පන;

පටිඝං තතියෙනෙව, කම්මමන්තෙන සාසවං.

275. තස්මා තෙසං න වත්තන්ති, තානි චිත්තානි සබ්බථා;

මග්ගට්ඨානං තු මග්ගොව, නාඤ්ඤං සම්භොති කිඤ්චිපි.

276. අහෙතුකවිපාකානි, ලබ්භමානාය වීථියා;

සබ්බථාපි ච සබ්බෙසං, සම්භවන්ති යථාරහං.

277. පඤ්චද්වාරෙ මනොද්වාරෙ, ධුවමාවජ්ජනද්වයං;

පරිත්තපුඤ්ඤාපුඤ්ඤානි, ලබ්භන්ති ලහුවුත්තිතො.

278. ක්‍රියාජවනමප්පනා, නත්ථාපායෙසු කාරණං;

නත්ථි සහෙතුකා පාකා, දුග්ගතත්තා හි සන්ධියා.

279. බ්‍රහ්මානං පටිඝං නත්ථි, ඣානවික්ඛම්භිතං තථා;

හෙට්ඨාඣානං විරත්තත්තා, න භාවෙන්ති අරූපිනො.

280. පුබ්බෙව දිට්ඨසච්චාව, අරියාරූපභූමකා;

තස්මාදිමග්ගො නත්ථෙත්ථ, කායාභාවා සිතං තථා.

281. සුද්ධාවාසාපි පත්තාව, හෙට්ඨානුත්තරපඤ්චකං;

සත්තපාපපහීනා ච, තස්මා නත්ථෙත්ථ තානි ච.

282. පඤ්චද්වාරිකචිත්තානි, ද්වාරාභාවෙ න විජ්ජරෙ;

සහෙතුකවිපාකා ච, යථාභූමිවවත්ථිතා.

283. සම්භවාසම්භවඤ්චෙවං, ඤත්වා පුග්ගලභූමිසු;

ලබ්භමානවසා තත්ථ, චිත්තසඞ්ගහමුද්දිසෙ.

284. කුසලාදිප්පභෙදා ච, තථා භූමාදිභෙදතො;

වත්ථුද්වාරාරම්මණතො, භූමිපුග්ගලතොපි ච.

285. විභාගො යො සමුද්දිට්ඨො,

චිත්තානඤ්ච තු සම්භවා;

ඤෙය්‍යො චෙතසිකානඤ්ච,

සම්පයොගානුසාරතොති.

ඉති චිත්තවිභාගෙ භූමිපුග්ගලසම්භවකථා නිට්ඨිතා.

සත්තමො පරිච්ඡෙදො.

නිට්ඨිතො ච චිත්තවිභාගො.