චතුත්ථො පරිච්ඡෙදො

4. වීථිපරිකම්මකථා

126. පඨමාවජ්ජනං පඤ්ච-දසන්නං පරතො භවෙ;

දුතියාවජ්ජනං හොති, එකවීසතිතො පරං.

127. එකම්හා පඤ්චවිඤ්ඤාණං, පඤ්චම්හා සම්පටිච්ඡනං;

සුඛසන්තීරණං හොති, පඤ්චවීසතිතො පරං.

128. සත්තතිංසතිතො හොති, උපෙක්ඛාතීරණද්වයං;

වොට්ඨබ්බනසරූපානං, ද්වින්නං කාමජවා පරං.

129. මග්ගාභිඤ්ඤා පරං ද්වින්නං, තිණ්ණන්නං ලොකියප්පනා;

ඵලා චතුන්නං පඤ්චන්නං, උපරිට්ඨඵලද්වයං.

130. භවන්ති චත්තාලීසම්හා, සුඛපාකා ද්විහෙතුකා;

තථෙකචත්තාලීසම්හා, උපෙක්ඛාය සමායුතා.

131. හොන්ති සත්තතිතො කාමෙ, සුඛපාකා තිහෙතුකා;

ද්වාසත්තතිම්හා ජායන්ති, උපෙක්ඛාසහිතා පන.

132. එකූනසට්ඨිතො රූප-පාකා පාකා අරූපිනො;

කමාට්ඨචත්තාලීසම්හා, තථෙකද්විතිහීනතො.

133. පුබ්බසඞ්ගහමිච්චෙවං, විගණෙත්වා විචක්ඛණො;

පරසඞ්ගහසඞ්ඛ්‍යාදිං, විභාවෙය්‍ය විසාරදො.

134. පඤ්චද්වාරාවජ්ජනතො, දස චිත්තානි දීපයෙ;

සෙසාවජ්ජනතො පඤ්චචත්තාලීසන්ති භාසිතං.

135. පඤ්චවිඤ්ඤාණතො පාපවිපාකා සම්පටිච්ඡනා;

පරමෙකං ද්වයං පුඤ්ඤවිපාකා සම්පටිච්ඡනා.

136. සන්තීරණා ද්විහෙතුම්හා, පාකා ද්වාදස ජායරෙ;

තිහෙතුකාමපාකම්හා, එකවීසති ලබ්භරෙ.

137. රූපාවචරපාකම්හා, පරමෙකූනවීසති;

නවට්ඨාරූපපාකම්හා, සත්ත ඡාපි යථාක්කමං.

138. පටිඝම්හා තු සත්තෙව, සිතම්හා තෙරසෙරිතා;

පාපපුඤ්ඤද්විහෙතුම්හා, එකවීසති භාවයෙ.

139. ද්විහෙතුකාමක්‍රියතො, අට්ඨාරස උපෙක්ඛකා;

සත්තරස සුඛොපෙතා, විභාවෙය්‍ය විචක්ඛණො.

140. කාමපුඤ්ඤතිහෙතුම්හා, තෙත්තිංසෙව උපෙක්ඛකා;

තෙපඤ්ඤාස සුඛොපෙතා, භවන්තීති පකාසිතං.

141. තිහෙතුකාමක්‍රියතො, චතුවීසතිපෙක්ඛකා;

සුඛිතම්හා තු දීපෙය්‍ය, පඤ්චවීසති පණ්ඩිතො.

142. දසරූපජවම්හෙකා-දසද්වාදස තෙරස;

යථාක්කමං පඤ්චදස, ආරුප්පා පරිදීපයෙ.

143. ඵලම්හා චුද්දසෙවාහු, මග්ගම්හා තු සකං ඵලං;

පරං සඞ්ගහමිච්චෙවං, විගණෙය්‍ය විසාරදො.

144. පුබ්බාපරසමොධාන-මිති ඤත්වා තතො පරං;

වත්ථුවීථිසමොධානං, යථාසම්භවමුද්දිසෙ.

145. පඤ්ච වත්ථූනි නිස්සාය, කමතො පඤ්චමානසා;

තෙත්තිංස පන නිස්සාය, හදයං මානසා සියුං.

146. කාමපාකමනොධාතු-හසිතුප්පාදමානසා;

දොසමූලානි මග්ගො ච, රූපජ්ඣානාව සබ්බථා.

147. දසාවසෙසාපුඤ්ඤානි, කාමපුඤ්ඤමහාක්‍රියා;

වොට්ඨබ්බාරූපජවනං, සත්ත ලොකුත්තරානි ච.

148. ද්වෙචත්තාලීස චිත්තානි, පඤ්චවොකාරභූමියං;

නිස්සාය හදයං හොන්ති, අරූපෙ නිස්සයං විනා.

149. ආරුප්පපාකා චත්තාරො, අනිස්සායෙති සබ්බථා;

විත්ථාරෙනට්ඨධා භින්නං, සඞ්ඛෙපා තිවිධං භවෙ.

150. තෙචත්තාලීස නිස්සාය, අනිස්සාය චතුබ්බිධං;

නිස්සිතානිස්සිතා සෙසා, ද්වෙචත්තාලීස මානසා.

151. පඤ්ච චිත්තප්පනා හොන්ති, කමෙනෙකෙකවීථියං;

මනොධාතුත්තිකං නාම, පඤ්චද්වාරිකමීරිතං.

152. සුඛතීරණවොට්ඨබ්බ-පරිත්තජවනා පන;

එකතිංසාපි ජායන්තෙ, ඡසු වීථීසු සම්භවා.

153. මහාපාකා පනට්ඨාපි, උපෙක්ඛාතීරණද්වයං;

ඡසු ද්වාරෙසු ජායන්ති, දස මුත්තා ච වීථියා.

154. චුතිසන්ධිභවඞ්ගානං, වසා පාකා මහග්ගතා;

නව වීථිවිමුත්තාති, දසධා වීථිසඞ්ගහො.

155. එකද්වාරිකචිත්තානි, පඤ්චඡද්වාරිකා තථා;

ඡද්වාරිකවිමුත්තා ච, විමුත්තාති ච සබ්බථා.

156. ඡත්තිංස තයෙකතිංස, දස චෙව නවෙති ච;

ඤත්වා වීථිසමොධානං, ගොචරඤ්ච සමුද්දිසෙ.

157. කමතො පඤ්චවිඤ්ඤාණා, ලොකුත්තරමහග්ගතා;

අභිඤ්ඤාවජ්ජිතා සබ්බා, පඤ්චතාලීස මානසා.

158. යථාසම්භවතො හොන්ති, රූපාදෙකෙකගොචරා;

පඤ්චගොචරමීරෙන්ති, මනොධාතුත්තිකං පන.

159. සන්තීරණමහාපාකා, පරිත්තජවනානි ච;

වොට්ඨබ්බනමභිඤ්ඤා ච, තෙචත්තාලීස සම්භවා.

160. ඡාරම්මණෙසු හොන්තීති, අට්ඨධා තිවිධා පුන;

එකාරම්මණචිත්තානි, පඤ්චඡාරම්මණානි ච.

161. සඞ්ඛෙපා මානසා පඤ්ච-චත්තාලීස තයො තථා;

තෙචත්තාලීස චෙවෙති, සත්තධාපි සියුං කථං.

162. කාමපාකමනොධාතු-හසිතුප්පාදමානසා;

පඤ්චවීස යථායොගං, පරිත්තාරම්මණා මතා.

163. කසිණුග්ඝාටිමාකාසං, පඨමාරුප්පමානසං;

තස්සෙව නත්ථිභාවං තු, තතියාරුප්පකං තථා.

164. ආලම්බිත්වා පවත්තන්ති, ආරුප්පා කමතො තතො;

දුතියඤ්ච චතුත්ථඤ්ච, ඡ මහග්ගතගොචරා.

165. අප්පමාණසමඤ්ඤා තෙ, නිබ්බානෙ පන ගොචරෙ;

අට්ඨ ලොකුත්තරා ධම්මා, නියමෙන වවත්ථිතා.

166. කසිණාසුභකොට්ඨාසෙ,

ආනාපානෙ ච යොගිනො;

පටිභාගනිමිත්තම්හි,

අප්පමඤ්ඤානුයුඤ්ජතො.

167. සත්තපණ්ණත්තියඤ්චෙව, රූපජ්ඣානං පවත්තති;

යථාවුත්තනිමිත්තම්හි, සෙසමාරුප්පකන්ති ච.

168. අභිඤ්ඤාවජ්ජිතා එකවීස මහග්ගතා සබ්බා;

සබ්බෙ පණ්ණත්තිසඞ්ඛාතෙ, නවත්තබ්බෙ පවත්තරෙ.

169. ජායන්තාකුසලා ඤාණවිප්පයුත්තජවා තථා;

අප්පමාණං විනා වීස, පරිත්තාදීසු තීසුපි.

170. තිහෙතුකාමපුඤ්ඤානි, පුඤ්ඤාභිඤ්ඤා ච පඤ්චිමෙ;

චතූසුපි පවත්තන්ති, අරහත්තද්වයං විනා.

171. ක්‍රියාභිඤ්ඤා ච වොට්ඨබ්බං, ක්‍රියාකාමෙ තිහෙතුකා;

ඡ සබ්බත්ථාපි හොන්තීති, සත්තධා මානසා ඨිතා.

172. එකතිච්චතුකොට්ඨාසගොචරා තිවිධා පන;

සමසට්ඨි තථා වීස, කමෙනෙකාදසෙති ච.

173. පඤ්චද්වාරෙසු පඤ්චාපි, පච්චුප්පන්නාව ගොචරා;

තෙකාලිකා නවත්තබ්බා, මනොද්වාරෙ යථාරහං.

174. අජ්ඣත්තා ච බහිද්ධා ච, පඤ්චද්වාරෙසු ගොචරා;

මනොද්වාරෙ නවත්තබ්බො, නත්ථිභාවොපි ලබ්භති.

175. පඤ්චද්වාරෙසු පඤ්චන්න-මෙකමෙකො ච ගොචරො;

ඡාපි ආරම්මණා හොන්ති, මනොද්වාරම්හි සබ්බථා.

176. පඤ්චද්වාරෙසු ගහිතං, තදඤ්ඤම්පි ච ගොචරං;

මනොද්වාරෙ වවත්ථානං, ගච්ඡතීති හි දෙසිතං.

177. අතීතා වත්තමානා ච, සම්භවා කාමසන්ධියා;

ඡද්වාරගහිතා හොන්ති, තිවිධා තෙපි ගොචරා.

178. කම්මනිමිත්තමෙවෙකං, මනොද්වාරෙ උපට්ඨිතං;

නවත්තබ්බමතීතඤ්ච, ධම්මාරම්මණසඞ්ගහං.

179. ආලම්බිත්වා යථායොගං, පටිසන්ධිමහග්ගතා;

අන්තෙ චුති භවෙ මජ්ඣෙ, භවඞ්ගම්පි පවත්තතීති.

ඉති චිත්තවිභාගෙ වීථිපරිකම්මකථා නිට්ඨිතා.

චතුත්ථො පරිච්ඡෙදො.