23. මූලවිසුද්ධිකථා

895. ඉත්ථං චිත්තං චෙතසිකං, රූපඤ්චෙවාති සඞ්ඛතා;

වුත්තා අසඞ්ඛතං දානි, නිබ්බානන්ති පවුච්චති.

896. සීලවිසුද්ධි ආදිම්හි, තතො චිත්තවිසුද්ධි ච;

දිට්ඨිවිසුද්ධිනාමා ච, කඞ්ඛාවිතරණාපි ච.

897. තතො පරං මග්ගාමග්ග-ඤාණදස්සනනාමිකා;

තථා පටිපදාඤාණ-දස්සනා ඤාණදස්සනං.

898. ඉච්චානුක්කමතො වුත්තා, සත්ත හොන්ති විසුද්ධියො;

සත්තමානුත්තරා තත්ථ, පුබ්බභාගා ඡ ලොකියා.

899. සංවරො පාතිමොක්ඛො ච, තථෙවින්ද්‍රියසංවරො;

ආජීවපාරිසුද්ධි ච, සීලං පච්චයනිස්සිතං.

900. ඉති සීලවිසුද්ධීති, සුද්ධමෙතං පවුච්චති;

චතුපාරිසුද්ධිසීලං, ධුතඞ්ගපරිවාරිතං.

901. කසිණානි දසාසුභා, දසානුස්සතියො පන;

අප්පමඤ්ඤා ච සඤ්ඤා ච, වවත්ථාරුප්පකාති ච.

902. සමථක්කම්මට්ඨානානි, තාලීසට්ඨකථානයෙ;

පාළියං තු විභත්තානි, අට්ඨතිංසාති වණ්ණිතං.

903. පථවාපො ච තෙජො ච,

වායො නීලඤ්ච පීතකං;

ලොහිතොදාතමාකාසං,

ආලොකකසිණන්ති ච.

904. කසිණානි දසෙතානි, වුත්තානට්ඨකථානයෙ;

අට්ඨෙව පාළියං හිත්වා, අන්තෙ තු කසිණද්වයං.

905. උද්ධුමාතං විනීලඤ්ච, විපුබ්බකං විඛායිතං;

විච්ඡිද්දකඤ්ච වික්ඛිත්තං, හතවික්ඛිත්තලොහිතං.

906. පුළවකං අට්ඨිකඤ්චෙති, අසුභා දස දෙසිතා;

රූපකායවිභාගාය, දසකායවිපත්තියා.

907. බුද්ධෙ ධම්මෙ ච සඞ්ඝෙ ච, සීලෙ චාගෙ ච අත්තනා;

දෙවතොපසමායඤ්ච, සත්තානුස්සතියො කමා.

908. මරණස්සති නාමෙකා, තථා කායගතාසති;

ආනාපානස්සතිච්චෙවං, දසානුස්සතියො මතා.

909. මෙත්තා කරුණා මුදිතා, උපෙක්ඛාති චතුබ්බිධා;

වුත්තා බ්‍රහ්මවිහාරා ච, අප්පමඤ්ඤාති තාදිනා.

910. එකාහාරෙ පටික්කූල-සඤ්ඤා නාමෙකමෙව තු;

චතුධාතුවවත්ථානං, චතුධාතුපරිග්ගහො.

911. ආකාසානඤ්චායතනං, විඤ්ඤාණඤ්චමථාපරං;

ආකිඤ්චඤ්ඤං තථා නෙව-සඤ්ඤානාසඤ්ඤනාමකං.

912. ඉච්චානුක්කමතො වුත්තා, අරූපජ්ඣානිකා පන;

අරූපකම්මට්ඨානානි, චත්තාරොපි පකිත්තිතා.

913. කසිණාසුභකොට්ඨාසෙ, ආනාපානෙ ච සබ්බථා;

දිස්වා සුත්වා ඵුසිත්වා වා, පරිකම්මං තු කුබ්බතො.

914. උග්ගහො නාම සම්භොති, නිමිත්තං තත්ථ යුඤ්ජතො;

පටිභාගො තමාරබ්භ, තත්ථ වත්තති අප්පනා.

915. සාධු සත්තා සුඛී හොන්තු, දුක්ඛා මුච්චන්තු පාණිනො;

අහො සත්තා සුඛප්පත්තා, හොන්තු යදිච්ඡකාති ච.

916. උද්දිස්ස වා අනොදිස්ස, යුඤ්ජතො සත්තගොචරෙ;

අප්පමඤ්ඤා පනප්පෙන්ති, අනුපුබ්බෙන වත්තිකා.

917. කසිණුග්ඝාටිමාකාසෙ, පඨමාරුප්පමානසෙ;

තස්සෙව නත්ථිභාවෙ ච, තතියාරුප්පකෙති ච.

918. යුඤ්ජන්තස්ස පනෙතෙසු, ගොචරෙසු චතූසුපි;

අප්පෙන්ති අනුපුබ්බෙන, ආරුප්පාපි චතුබ්බිධා.

919. ආනාපානඤ්ච කසිණං, පඤ්චකජ්ඣානිකං තහිං;

පඨමජ්ඣානිකා වුත්තා, කොට්ඨාසාසුභභාවනා.

920. සුඛිතජ්ඣානිකා තිස්සො, අප්පමඤ්ඤා ච හෙට්ඨිමා;

උපෙක්ඛාරුප්පකා පඤ්ච, උපෙක්ඛාඣානිකාති ච.

921. එකා දසෙකා දස ච, තයො පඤ්චෙති සබ්බථා;

පරිකම්මවසා තිංස, ඡ කොට්ඨාසා යථාක්කමං.

922. පඤ්චකාදිසුඛොපෙක්ඛා, ඣානභෙදා චතුබ්බිධා;

එකච්චතුපඤ්චඣාන-වසෙන තිවිධා සියුං.

923. රූපාරූපවසා ද්වෙ ච, අප්පනාතො පුනෙකධා;

ඉච්චෙවමප්පනා කම්ම-ට්ඨානභෙදා සමිස්සිතා.

924. ද්වෙ ච සඤ්ඤාවවත්ථානා, අට්ඨානුස්සතියොති ච;

සෙසා දස පවුච්චන්ති, උපචාරසමාධිකා.

925. පරිකම්මොපචාරානුලොමගොත්‍රභුතො පරං;

පඤ්චමං වා චතුත්ථං වා, ජවනං හොති අප්පනා.

926. අප්පනාජවනං සබ්බං, ලොකුත්තරමහග්ගතං;

තිහෙතුකපරිත්තානි, පුරිමානි යථාරහං.

927. ආවජ්ජනා ච වසිතා, තංසමාපජ්ජනා තථා;

අධිට්ඨානා ච වුට්ඨානා, පච්චවෙක්ඛණ පඤ්චමා.

928. වසිතාහි වසීභූතා, ඉති කත්වාන පඤ්චහි;

භාවෙන්තස්ස පනප්පෙන්ති, උපරූපරි අප්පනා.

929. යුඤ්ජන්තස්ස තු වුට්ඨාය, කසිණජ්ඣානපඤ්චමා;

පඤ්චාභිඤ්ඤා හි අප්පෙන්ති, රූපසද්දාදිගොචරෙ.

930. ලොකුත්තරා පනප්පෙන්ති, සබ්බෙ නිබ්බානගොචරෙ;

අනිච්චදුක්ඛානත්තාති, භූමිධම්මෙ විපස්සතො.

931. තත්ථ ච පාදකජ්ඣානං, සම්මට්ඨජ්ඣානමෙව වා;

අජ්ඣාසයො ච වුට්ඨාන-ගාමිනී ච විපස්සනා.

932. මග්ගානං ඣානභෙදාය, යථායොගං නියාමතා;

යථාසකං ඵලානං තු, මග්ගා හොන්ති නියාමතා.

933. මග්ගානන්තරමෙවාථ, භූමිධම්මෙ විපස්සතො;

ඵලසමාපත්තියම්පි, අප්පෙති ඵලමානසං.

934. අනුපුබ්බසමාපත්තිං, සමාපජ්ජිස්ස වුට්ඨිතො;

ඣානධම්මෙ විපස්සිත්වා, තත්ථ තත්ථෙව පණ්ඩිතො.

935. චතුත්ථාරුප්පමප්පෙත්වා, එකද්විජවනාපරං;

නිරොධං නාම ඵුසති, සමාපත්තිමචිත්තකං.

936. අරහා වා අනාගාමී, පඤ්චවොකාරභූමියං;

යථාසකං ඵලුප්පාදො, වුට්ඨානන්ති තතො මතො.

937. අප්පනාපරියොසානෙ, සියා සබ්බත්ථ සම්භවා;

භවඞ්ගපාතො තං ඡෙත්වා, ජායතෙ පච්චවෙක්ඛණා.

938. ඉති වුත්තානුසාරෙන, අප්පනානයසඞ්ගහං;

යථායොගං විභාවෙය්‍ය, තත්ථ තත්ථ විචක්ඛණො.

939. චිත්තවිසුද්ධි නාමායං, චිත්තසංක්ලෙසසොධනො;

උපචාරප්පනාභෙදො, සමථො පුබ්බභාගියොති.

ඉති නිබ්බානවිභාගෙ මූලවිසුද්ධිකථා නිට්ඨිතා.

තෙවීසතිමො පරිච්ඡෙදො.