පන්නරසමො පරිච්ඡෙදො

513. තෙත්තිංස චෙව ද්වත්තිංස, එකතිංස ච තිංස ච;

එකද්වත්තිංසහීනා ච, තිංස ධම්මානවජ්ජකෙ.

514. දස ධම්මා තු සාවජ්ජෙ, ඡපඤ්චචතුරාධිකා;

එකාදස දස නව, සත්තධාහෙතුකෙ පන.

515. ඉත්ථං චුද්දසධා භින්නා, කොට්ඨාසා තු සරූපතො;

විභත්තා තෙහි යුත්තා ච, චිත්තුප්පාදා යථාක්කමං.

516. තිකට්ඨකා පඤ්චවීස, දස පඤ්චාධිකා නව;

අට්ඨාරසෙති සත්තෙතෙ, අනවජ්ජා තථෙතරෙ.

517. ද්වෙ චත්තාරො ඡළෙකං ද්වෙ,

පඤ්චාථ දසධාපරෙ;

සාවජ්ජාහෙතුකා චෙති,

කොට්ඨාසා හොන්ති චුද්දස.

518. නව චාපි ඡ චත්තාරො, චතුපඤ්චඡසත්තකා;

නව ද්වෙ ද්වෙ තථෙකො ච, යෙවාපනකසඞ්ගහා.

519. තෙහි යුත්තා පනට්ඨාථ, වීසෙකතිංස මානසා;

ද්වෙ ද්වෙ ද්වෙ තීණි චෙකං ද්වෙ, අට්ඨ දස යථාක්කමං.

520. සත්තතිංසකතො යාව, එකතිංසානවජ්ජකෙ;

තිකට්ඨකාදිකෙ සත්ත, ඨිතා නියතසඞ්ගහා.

521. පාපෙසු වීස චෙකූන-වීසට්ඨාරස සොළස;

චතුධා ද්වීසු චතූසු, චතූසු ද්වීසු චට්ඨිතා.

522. එකද්විපඤ්චදසසු, ච ද්විධාහෙතුකෙසු ච;

තිකද්වෙකාධිකා ධම්මා, දසට්ඨ ච යථාක්කමං.

523. පඤ්චද්වෙකද්විභිපඤ්ච, කොට්ඨාසා නියතා ඨිතා;

තෙහි යුත්තා පනට්ඨාථ, වීස ද්වෙ ද්වෙ තිකෙකකා.

524. පුබ්බාපරද්වයාපුඤ්ඤෙ, කාමපාකෙ අහෙතුකෙ;

පඤ්චමානුත්තරාරුප්පෙ, නත්ථානියතසම්භවො.

525. ඡත්තිංසමානසෙස්වෙව, ලබ්භන්තානියතා න වා;

තෙපඤ්ඤාසාවසෙසා තු, සබ්බෙ නියතයොගිනො.

526. නියතානියතෙ කත්වා, ලබ්භන්තොභයථා තථා;

සරූපයෙවොභයකා, තිවිධෙවං තු සඞ්ගහා.

527. ඤෙය්‍යා වුත්තානුසාරෙන, තෙහි යුත්තාව මානසා;

තතො පුන විභාවෙය්‍ය, සබ්බසඞ්ගාහිකං නයං.

528. එකූනතාලීසකතො, යාවෙකත්තිංසකා ඨිතා;

නවධා අනවජ්ජෙසු, තෙහි යුත්තා ච මානසා.

529. ද්වෙ චත්තාරො දසෙවාථ, තිකපඤ්චාධිකා දස;

තෙවීස කමතො සත්ත, ද්වෙ ච පඤ්චදසාපරෙ.

530. ද්වෙ ච ද්වෙ තිකද්වෙ ද්වෙකා, සාවජ්ජෙසු ච සොළස;

එකූනවීස වීසාථ, වීසෙකද්විතයාධිකා.

531. අහෙතුකෙ පනට්ඨාථ, දසෙකද්විතයාධිකා;

දසපඤ්ච ද්විකෙකාති, භවන්තෙකූනවීසති.

532. ලබ්භමානානුසාරෙන, ධම්මානං පන සඞ්ගහො;

සක්කා වුත්තනයෙනෙව, විඤ්ඤාතුං පන විඤ්ඤුනාති.

ඉති චෙතසිකවිභාගෙ රාසිසඞ්ගහකථා නිට්ඨිතා.

පන්නරසමො පරිච්ඡෙදො.