14. රාසිසම්භවකථා

490. නවෙව යෙවාපනකා, අට්ඨාරස ච රාසයො;

නවභිංසතිසම්භින්නා, දස ද්වෙ සවිභත්තිකා.

491. එකද්වයතිචතුඡසත්තට්ඨානානවජ්ජකෙ;

සත්තවීසති සත්තෙකො, ද්වයමෙකො පුනෙකකො.

492. දසෙව යෙවාපනකා, එකාදස ච රාසයො;

අට්ඨවීසතිසම්භින්නා, දසෙව සවිභත්තිකා.

493. එකද්වයතිචතුක්කඡට්ඨානනියතා පන;

අට්ඨාරස ච සත්තෙකො, එකො චෙකොව පාපකෙ.

494. ද්වෙ යෙවාපනකා හොන්ති, රාසයො ච චතුබ්බිධා;

තෙරසෙත්ථ අසම්භින්නා, තයොව සවිභත්තිකා.

495. එකද්වයතිකට්ඨානා, දස ද්වෙකො අහෙතුකෙ;

ඉච්චානවජ්ජා සාවජ්ජා-හෙතුකෙ යොගනිච්ඡයො.

496. සත්තාපි නත්ථි සාවජ්ජෙ, නිරවජ්ජෙ පකාසකො;

අහෙතුකෙ ච මග්ගාදිරාසයො නත්ථි චුද්දස.

497. අනවජ්ජා තු සාවජ්ජෙ, සාවජ්ජකානවජ්ජකෙ;

චිත්තුප්පාදම්හි නත්ථෙව, නත්ථොභයමහෙතුකෙ.

498. සාවජ්ජා පන සාවජ්ජෙ, අනවජ්ජානවජ්ජකෙ;

ගහෙතබ්බා තු සබ්බත්ථ, සාධාරණා පකිණ්ණකා.

499. ඣානපඤ්චකචිත්තෙසු, සත්තසට්ඨිසු නිද්දිසෙ;

ඣානඞ්ගයොගභෙදෙන, රාසිභෙදං තහිං තහිං.

500. චතුඡක්කානවජ්ජෙසු, ඤාණපීතිකතං තථා;

චතුවීස පරිත්තෙසු, චතුධා භෙදමුද්දිසෙ.

501. සරාගවීතරාගානං, අප්පමඤ්ඤාපවත්තියං;

කරුණාමුදිතා හොන්ති, කාමපුඤ්ඤමහාක්‍රියෙ.

502. උපචාරප්පනාපත්තා, සුඛිතා සත්තගොචරා;

තස්මා න පඤ්චමාරුප්පෙ, මහාපාකෙ අනුත්තරෙ.

503. සොතාපතිතුපෙක්ඛාසු, පරිකම්මාදිසම්භවෙ;

ඣානානං තුල්‍යපාකත්තා, තප්පාකෙසු ච ලබ්භරෙ.

504. විරතී ච සරාගානං, වීතික්කමනසම්භවා;

සම්පත්තෙ ච සමාදානෙ, කාමපුඤ්ඤෙසු ලබ්භරෙ.

505. තංතංද්වාරිකදුස්සිල්‍ය-චෙතනුච්ඡෙදකිච්චතො;

මග්ගෙ ච තුල්‍යපාකත්තා, ඵලෙ ච නියතා සියුං.

506. පවත්තාකාරවිසයභින්නා පඤ්චාපි සම්භවා;

ලොකියෙ ලබ්භමානාපි, විසුං චෙව සියුං න වා.

507. පාපා ලබ්භන්ති පාපෙසු, සත්ත ඡක්කෙකකා කමා;

සරූපයෙවොභයකා, නියතට්ඨ ඡළෙතරෙ.

508. සාධාරණා ච සබ්බත්ථ, යථාවුත්තා පකිණ්ණකා;

තත්ථ චෙකග්ගතා නත්ථි, ඉන්ද්‍රියාදීසු කඞ්ඛිතෙ.

509. ඡන්දාධිමොක්ඛා යෙවාපි, වීසෙකාදසවජ්ජිතෙ;

උද්ධච්චමෙකාදසසු, මජ්ඣත්තමනවජ්ජකෙ.

510. සබ්බත්ථ මනසිකාරො, තිද්වෙකද්විතිකාපරෙ;

අට්ඨට්ඨවීසචතූසු, පඤ්චද්වීසු යථාක්කමං.

511. සමුදායවසෙනෙත්ථ, උද්ධච්චවිරතිත්තයං;

සවිභත්තිකමඤ්ඤත්ථ, අවිභත්තිකමෙව තං.

512. චිත්තුප්පාදෙසු තෙනෙතං, විභත්තිඅවිභත්තිකං;

ඉති සාධු සල්ලක්ඛෙය්‍ය, සම්භවාසම්භවං බුධොති.

ඉති චෙතසිකවිභාගෙ රාසිසම්භවකථා නිට්ඨිතා.

චුද්දසමො පරිච්ඡෙදො.