එකාදසමො පරිච්ඡෙදො

11. රාසිසරූපකථා

384. සබ්බං සභාවසාමඤ්ඤ-විසෙසෙන යථාරහං;

ගතරාසිවසෙනාථ, අට්ඨාරසවිධං කථං.

385. ඵස්සපඤ්චකරාසී ච, ඣානින්ද්‍රියමථාපරෙ;

මග්ගබලහෙතුකම්ම-පථලොකියරාසයො.

386. නිරවජ්ජා ඡ පස්සද්ධි-ආදිකා ච සතීමතා;

යුගනන්ධා ච සමථා, තථා යෙවාපනාති ච.

387. ඵස්සො ච වෙදනා සඤ්ඤා, චෙතනා චිත්තමෙව ච;

ඵස්සපඤ්චකරාසීති, පඤ්ච ධම්මා පකාසිතා.

388. විතක්කො ච විචාරො ච, පීති චෙකග්ගතා තථා;

සුඛං දුක්ඛමුපෙක්ඛාති, සත්ත ඣානඞ්ගනාමකා.

389. සද්ධින්ද්‍රියඤ්ච වීරියං, සති චෙව සමාධි ච;

පඤ්ඤා චතුබ්බිධා වුත්තා, මනො පඤ්චාපි වෙදනා.

390. ජීවිතින්ද්‍රියමෙකන්ති, චක්ඛාදීනි ච සත්තධා;

බාවීසතින්ද්‍රියා නාම, ධම්මා සොළස දෙසිතා.

391. ආදිමග්ගෙ අනඤ්ඤාත-ඤ්ඤස්සාමීතින්ද්‍රියං භවෙ;

මජ්ඣෙ අඤ්ඤින්ද්‍රියං අන්තෙ, අඤ්ඤාතාවින්ද්‍රියන්ති ච.

392. පඤ්ඤානුත්තරචිත්තෙසු, හොන්ති තීණින්ද්‍රියානිපි;

තිහෙතුකෙසු සෙසෙසු, එකං පඤ්ඤින්ද්‍රියං මතං.

393. සුඛං දුක්ඛින්ද්‍රියඤ්චෙව, සොමනස්සින්ද්‍රියං තථා;

දොමනස්සමුපෙක්ඛාති, පඤ්චධා වෙදනා කථා.

394. රූපාරූපවසා ද්වෙධා, ජීවිතින්ද්‍රියමෙකකං;

චක්ඛුසොතඝානජිව්හාකායිත්ථිපුරිසින්ද්‍රියා.

395. තත්ථ ජීවිතරූපඤ්ච, අට්ඨෙත්ථ න තු ගය්හරෙ;

තස්මා නාමින්ද්‍රියානෙව, දසපඤ්ච විනිද්දිසෙ.

396. සම්මාදිට්ඨි ච සඞ්කප්පො, වායාමො විරතිත්තයං;

සම්මාසති සමාධි ච, මිච්ඡාදිට්ඨි ච ධම්මතො.

397. මග්ගඞ්ගානි නවෙතානි, ද්වාදසාපි යතො ද්විධා;

සම්මාමිච්ඡාති සඞ්කප්පො, වායාමො ච සමාධි ච.

398. ලොකපාලදුකඤ්චෙව, හිරොත්තප්පමථාපරං;

අහිරීකමනොත්තප්පං, දුකං ලොකවිනාසකං.

399. පඤ්ච සද්ධාදයො චෙති, බලධම්මා නවෙරිතා;

කණ්හසුක්කවසෙනාපි, පටිපක්ඛෙ අකම්පියා.

400. ඡ හෙතූ හෙතුරාසිම්හි,

ලොභාලොභාදිකා තිකා;

මොමූහෙ කඞ්ඛිතුද්ධච්චා,

තත්ථ වුත්තාති අට්ඨධා.

401. මිච්ඡාදිට්ඨි අභිජ්ඣා ච, බ්‍යාපාදො විරතිත්තයං;

සම්මාදිට්ඨිනභිජ්ඣා ච, අබ්‍යාපාදො ච චෙතනා.

402. දස කම්මපථානෙත්ථ, වුත්තා විරතිචෙතනා;

ලොකපාලවිනාසාති, වුත්තා ලොකදුකා ද්විධා.

403. පස්සද්ධිආදියුගළා, නිරවජ්ජා ඡ රාසයො;

සති ච සම්පජඤ්ඤඤ්ච, උපකාරදුකං භවෙ.

404. යුගනන්ධදුකං නාම, සමථො ච විපස්සනා;

පග්ගහො ච අවික්ඛෙපො, සමථද්දුකමීරිතං.

405. යෙ සරූපෙන නිද්දිට්ඨා, චිත්තුප්පාදෙසු තාදිනා;

තෙ ඨපෙත්වාවසෙසා තු, යෙවාපනකනාමකා.

406. ඡන්දො ච අධිමොක්ඛො ච, තත්‍රමජ්ඣත්තතා තථා;

උද්ධච්චං මනසිකාරො, පඤ්චාපණ්ණකනාමකා.

407. මානො ච ථිනමිද්ධඤ්ච, ඉස්සා මච්ඡරියං තථා;

කුක්කුච්චමප්පමඤ්ඤා ච, තිස්සො විරතියොපි ච.

408. එතෙ අනියතා නාම, එකාදස යථාරහං;

තතො ච සෙසා සබ්බෙපි, නියතාති පකිත්තිතා.

409. කෙචි රාසිං න භජන්ති, කෙචි චානියතා යතො;

තස්මා යෙවාපනාතෙව, ධම්මා සොළස දෙසිතා.

410. සත්තතිංසාවසෙසා තු, තත්ථ තත්ථ යථාරහං;

සරූපෙනෙව නිද්දිට්ඨා, චිත්තුප්පාදෙසු සබ්බථා.

411. දෙසිතානුත්තරුද්ධච්චෙ, නාමතො විරතුද්ධවා;

තථානුත්තරචිත්තෙසු, නියතං විරතිත්තයං.

412. චිත්තං විතක්කො සද්ධා ච,

හිරොත්තප්පබලද්වයං;

අලොභො ච අදොසො ච,

ලොභො දොසො ච දිට්ඨි ච.

413. අහිරීකමනොත්තප්පං,

උද්ධච්චං විරතිත්තයං;

සොළසෙතෙ යථායොගං,

ද්වීසු ඨානෙසු දෙසිතා.

414. වෙදනා තීසු වීරියං, සති ච චතුරාසිකා;

සමාධි ඡසු පඤ්ඤා ච, සත්තට්ඨානෙසු දීපිතා.

415. එකවීස පනිච්චෙතෙ, සවිභත්තිකනාමකා;

සෙසා ද්වත්තිංසති ධම්මා, සබ්බෙපි අවිභත්තිකාති.

ඉති චෙතසිකවිභාගෙ රාසිසරූපකථා නිට්ඨිතා.

එකාදසමො පරිච්ඡෙදො.