ද්වාදසමො පරිච්ඡෙදො

12. රාසිවිනිච්ඡයකථා

416. තත්ථ විඤ්ඤාණකායා ඡ, සත්ත විඤ්ඤාණධාතුයො;

ඵස්සා චක්ඛාදිසම්ඵස්සා, ඡබ්බිධා සත්තධාපි ච.

417. චක්ඛුසම්ඵස්සජාදීහි, භෙදෙහි පන වෙදනා;

සඤ්ඤා ච චෙතනා චෙව, භින්නා ඡධා ච සත්තධා.

418. චිත්තුප්පාදෙසු ධම්මා ච, ඛන්ධායතනධාතුයො;

ආහාරා ච යථායොගං, ඵස්සපඤ්චකරාසියං.

419. සබ්බෙ සඞ්ගහිතා හොන්ති, තස්මා නාමපරිග්ගහො;

මූලරාසි ච සො සබ්බ-සඞ්ගහොති පවුච්චති.

420. ඣානරාසිම්හි පඤ්චෙව, ධම්මා සත්තප්පභෙදතො;

ඉන්ද්‍රියානි ච බාවීස, ධම්මතො පන සොළස.

421. නව මග්ගඞ්ගධම්මා ච, භින්නා ද්වාදසධාපි තෙ;

ඡළෙව හෙතුයො තත්ථ, දෙසිතා කඞ්ඛිතුද්ධවා.

422. දස කම්මපථා ධම්මා, ඡළෙව පන දෙසිතා;

සෙසාව දසධම්මෙහි, සමානා චතුරාසයො.

423. පඤ්ඤා දසවිධා තත්ථ, වෙදනා නවධා ඨිතා;

සමාධි සත්තධා හොති, වීරියං පන පඤ්චධා.

424. සති භින්නා චතුධාව, විතක්කො තිවිධො මතො;

ද්විධා චිත්තාදයො හොන්ති, දසපඤ්චෙව සම්භවා.

425. සෙසා ද්වත්තිංස සබ්බෙපි, ධම්මා එකෙකධාපි ච;

හිත්වා රූපින්ද්‍රියානෙතෙ, විභාගා අට්ඨධා කථං.

426. ඵස්සො ච චෙතනා සඤ්ඤා, විචාරො පීති ජීවිතං;

නිරවජ්ජා ඡ යුගළා, සාවජ්ජමොහකඞ්ඛිතා.

427. යෙවාපනකධම්මා ච, විරතුද්ධච්චවජ්ජිතා;

ද්වාදසා චෙති සබ්බෙපි, ද්වත්තිංසකෙකධා තථා.

428. චිත්තං මනින්ද්‍රියං චිත්තං, සද්ධා සද්ධින්ද්‍රියං බලං;

බලෙසු ලොකියා වුත්තා, ලොකියෙ ච දුකද්වයෙ.

429. ලොභාලොභාදිකා ද්වෙ ද්වෙ,

චත්තාරො හෙතුරාසියං;

මිච්ඡාදිට්ඨි ච මග්ගඞ්ගෙ,

පඤ්චකම්මපථෙපි තෙ.

430. යෙවාපනකරාසිම්හි, දෙසිතා විරතුද්ධවා;

මග්ගහෙතූසු චෙවෙති, ද්විධා පඤ්චදස ඨිතා.

431. විතක්කො ඣානමග්ගෙසු, තිවිධා නවධා පන;

වෙදනා මූලරාසිම්හි, තථා ඣානින්ද්‍රියෙසු ච.

432. ඉන්ද්‍රියමග්ගරාසිම්හි, බලපිට්ඨිදුකත්තිකෙ;

චතුධා සති තත්ථෙව, වීරියම්පි ච පඤ්චධා.

433. සමාධි සත්තධා වුත්තො, ඣානඞ්ගෙසු ච තත්ථ ච;

තත්ථෙව දසධා පඤ්ඤා, හෙතුකම්මපථෙසු ච.

434. දසනවසත්තපඤ්චචතුතිද්වෙකධා ඨිතා;

ඡළෙකකා පඤ්චදස, ද්වත්තිංස ච යථාක්කමං.

435. අට්ඨ විභාගසඞ්ඛෙපා, පදානි දසධා සියුං;

තෙපඤ්ඤාසෙව ධම්මා ච, අට්ඨාරස ච රාසයො.

436. ඉති ධම්මවවත්ථානෙ, ධම්මසඞ්ගණියං පන;

චිත්තුප්පාදපරිච්ඡෙදෙ, උද්දෙසනයසඞ්ගහො.

437. පදානි චතුරාසීති, දෙසිතානි සරූපතො;

යෙවාපනකනාමෙන, සොළසෙව යථාරහං.

438. තත්ථානියතනාමානි, පදානෙකාදසෙව තු;

වුත්තානෙකූනනවුති, නියතානෙව සම්භවා.

439. අසම්භින්නපදානෙත්ථ, තෙපඤ්ඤාසෙව සබ්බථා;

චිත්තචෙතසිකානං තු, වසෙන පරිදීපයෙ.

440. විභාගපදධම්මානං, වසෙනෙවං පකාසිතො;

චිත්තචෙතසිකානං තු, කමතො රාසිනිච්ඡයොති.

ඉති චෙතසිකවිභාගෙ රාසිවිනිච්ඡයකථා නිට්ඨිතා.

ද්වාදසමො පරිච්ඡෙදො.