10. පභෙදකථා

352. එකුප්පාදා නිරොධා ච, එකාලම්බණවත්ථුකා;

සහගතා සහජාතා, සංසට්ඨා සහවුත්තිනො.

353. තෙපඤ්ඤාස පනිච්චෙතෙ, සම්පයුත්තා යථාරහං;

චිත්තචෙතසිකා ධම්මා, අට්ඨාරසවිධාපි ච.

354. එකධා ඡබ්බිධා චෙව, චතුධා සත්තධා ඨිතා;

චිත්තුප්පාදපභෙදෙන, භින්දිතබ්බා විභාවිනා.

355. අට්ඨ ධම්මාවිනිබ්භොගා, භින්නාසීති නවුත්තරා;

සත්තසතං දස ද්වෙ ච, සබ්බෙ හොන්ති සමිස්සිතා.

356. සන්තීරණමනොධාතු, සිතවොට්ඨබ්බනා තථා;

අපුඤ්ඤා කාමපුඤ්ඤා ච, මහාපාකා මහාක්‍රියා.

357. පඨමජ්ඣානධම්මා ච, ලොකුත්තරමහග්ගතා;

පඤ්චපඤ්ඤාස සබ්බෙපි, විතක්කා හොන්ති භෙදිතා.

358. විචාරාපි ච තෙයෙව, දුතියජ්ඣානනාමකා;

එකාදසාපරෙ චෙති, ඡසට්ඨි පරිදීපිතා.

359. අපුඤ්ඤා කාමපුඤ්ඤා ච, මහාපාකා මහාක්‍රියා;

චතුක්කා චෙව චත්තාරො, සිතඤ්ච සුඛතීරණං.

360. පඨමාදිතිකජ්ඣානා, ලොකුත්තරමහග්ගතා;

ඉච්චෙවමෙකපඤ්ඤාස, පීතියො හොන්ති සබ්බථා.

361. සිතවොට්ඨබ්බනා ද්වෙ ච, සාවජ්ජා චානවජ්ජකා;

භින්නමෙවං තු වීරියං, තෙසත්තතිවිධං භවෙ.

362. සාවජ්ජා චානවජ්ජා ච, මොමූහද්වයවජ්ජිතා;

ඡන්දා භවන්ති සබ්බෙපි, සට්ඨිභෙදා නවුත්තරා.

363. සන්තීරණමනොධාතු, සිතවොට්ඨබ්බනා තථා;

සාවජ්ජා චානවජ්ජා ච, විචිකිච්ඡාවිවජ්ජිතා.

364. අධිමොක්ඛා පනිච්චෙවං, අට්ඨසත්තති භෙදිතා;

තිසතං නවුති ද්වෙ ච, භින්නා හොන්ති පකිණ්ණකා.

365. එකූනසට්ඨි වා හොන්ති, සද්ධාදෙකූනවීසති;

සහස්සඤ්ච සතඤ්චෙකං, එකවීසඤ්ච සබ්බථා.

366. ඤාණෙන සම්පයුත්තා ච, කාමෙ ද්වාදසධාපරෙ;

පඤ්චතිංසාති පඤ්ඤාපි, සත්තතාලීසධා කථා.

367. රූපජ්ඣානචතුක්කා ච, කාමපුඤ්ඤා මහාක්‍රියා;

අට්ඨවීසප්පමඤ්ඤෙවං, ඡප්පඤ්ඤාස භවන්ති ච.

368. අනුත්තරා කාමපුඤ්ඤා, තිස්සො විරතියො පන;

හොන්ති සොළසධා භින්නා, අට්ඨතාලීස පිණ්ඩිතා.

369. පඤ්චවීසානවජ්ජෙවං, සම්පයුත්තා චතුබ්බිධා;

සහස්සද්විසතඤ්චෙව, ද්වි ච සත්තති භෙදතො.

370. චත්තාරො පාපසාමඤ්ඤා, භින්නා ද්වාදසධා පන;

අට්ඨතාලීසධා හොන්ති, තෙ සබ්බෙ පරිපිණ්ඩිතා.

371. ලොභො පනට්ඨධා භින්නො, ථිනමිද්ධඤ්ච පඤ්චධා;

චතුධා දිට්ඨිමානො ච, චතුධා දිට්ඨියො විසුං.

372. ද්විධා දොසාදිචත්තාරො, විචිකිච්ඡෙකධාති ච;

සාවජ්ජා සත්තධා වුත්තා, භින්නාසීති තිකුත්තරා.

373. ඉච්චට්ඨාරසධා වුත්තා, තෙපඤ්ඤාසාපි භෙදතො;

ද්විසහස්සඤ්ච තු සතං, භවන්තෙකූනසට්ඨි ච.

374. විතක්කවිචාරපීතිසුඛොපෙක්ඛාසු පඤ්චසු;

භින්දිත්වා ඣානභෙදෙන, ගහෙතබ්බා අනුත්තරා.

375. අඤ්ඤත්‍ර පන සබ්බත්ථ, නත්ථි භෙදප්පයොජනං;

අට්ඨෙව කස්මා ගය්හන්ති, අභෙදෙනාති ලක්ඛයෙ.

376. පඨමාදිචතුජ්ඣානා, ලොකුත්තරමහග්ගතා;

ඉච්චෙකමෙකදසධා, චතුතාලීස පිණ්ඩිතා.

377. තෙවීස පඤ්චමා චෙති, සත්තසට්ඨි සමිස්සිතා;

අප්පනා තත්ථ සබ්බාපි, අට්ඨපඤ්ඤාස දීපිතා.

378. පඤ්චතිංසෙව සඞ්ඛෙපා, ලොකුත්තරමහග්ගතා;

අප්පනා තත්ථ සබ්බාපි, ඡබ්බීසති පකාසිතා.

379. ඉද්ධිවිධං දිබ්බසොතං, චෙතොපරියනාමකා;

පුබ්බෙනිවාසානුස්සති, දිබ්බචක්ඛූති පඤ්චධා.

380. අභිඤ්ඤාඤාණමීරෙන්ති, රූපාවචරපඤ්චමා;

කුසලඤ්ච ක්‍රියා චෙති, භෙදිතං දුවිධම්පි ච.

381. තං ද්වයම්පි සම්මිස්සෙත්වා, පඤ්චාභිඤ්ඤා ච ලොකියා;

ආසවක්ඛයඤාණඤ්ච, ඡළභිඤ්ඤා පවුච්චරෙ.

382. ලොකියා ච දසාභිඤ්ඤා, භින්දිත්වා කුසලක්‍රියා;

සත්තසත්තති ඣානානි, අට්ඨසට්ඨි පනප්පනා.

383. සත්තසත්තති චිත්තානි, චතුපඤ්ඤාස සබ්බථා;

පචිතානි ච චිත්තානි, එකතිංසසතං සියුන්ති.

ඉති චෙතසිකවිභාගෙ පභෙදකථා නිට්ඨිතා.

දසමො පරිච්ඡෙදො.