3. බ්‍රහ්මදෙවසුත්තං
174. එවං මෙ සුතං – එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන අඤ්ඤතරිස්සා බ්‍රාහ්මණියා බ්‍රහ්මදෙවො නාම පුත්තො භගවතො සන්තිකෙ අගාරස්මා අනගාරියං පබ්බජිතො හොති.
අථ ඛො ආයස්මා බ්‍රහ්මදෙවො එකො වූපකට්ඨො අප්පමත්තො ආතාපී පහිතත්තො විහරන්තො නචිරස්සෙව – යස්සත්ථාය කුලපුත්තා සම්මදෙව අගාරස්මා අනගාරියං පබ්බජන්ති, තදනුත්තරං බ්‍රහ්මචරියපරියොසානං දිට්ඨෙව ධම්මෙ සයං අභිඤ්ඤා සච්ඡිකත්වා උපසම්පජ්ජ විහාසි. ‘‘ඛීණා ජාති, වුසිතං බ්‍රහ්මචරියං, කතං කරණීයං, නාපරං ඉත්ථත්තායා’’ති අබ්භඤ්ඤාසි. අඤ්ඤතරො ච පනායස්මා බ්‍රහ්මදෙවො අරහතං අහොසි.
අථ ඛො ආයස්මා බ්‍රහ්මදෙවො පුබ්බණ්හසමයං නිවාසෙත්වා පත්තචීවරමාදාය සාවත්ථිං පිණ්ඩාය පාවිසි. සාවත්ථියං සපදානං පිණ්ඩාය චරමානො යෙන සකමාතු නිවෙසනං තෙනුපසඞ්කමි. තෙන ඛො පන සමයෙන ආයස්මතො බ්‍රහ්මදෙවස්ස මාතා බ්‍රාහ්මණී බ්‍රහ්මුනො ආහුතිං නිච්චං පග්ගණ්හාති. අථ ඛො බ්‍රහ්මුනො සහම්පතිස්ස එතදහොසි – ‘‘අයං ඛො ආයස්මතො බ්‍රහ්මදෙවස්ස මාතා බ්‍රාහ්මණී බ්‍රහ්මුනො ආහුතිං නිච්චං පග්ගණ්හාති. යංනූනාහං තං උපසඞ්කමිත්වා සංවෙජෙය්‍ය’’න්ති. අථ ඛො බ්‍රහ්මා සහම්පති – සෙය්‍යථාපි නාම බලවා පුරිසො සමිඤ්ජිතං වා බාහං පසාරෙය්‍ය, පසාරිතං වා බාහං සමිඤ්ජෙය්‍ය එවමෙව – බ්‍රහ්මලොකෙ අන්තරහිතො ආයස්මතො බ්‍රහ්මදෙවස්ස මාතු නිවෙසනෙ පාතුරහොසි. අථ ඛො බ්‍රහ්මා සහම්පති වෙහාසං ඨිතො ආයස්මතො බ්‍රහ්මදෙවස්ස මාතරං බ්‍රාහ්මණිං ගාථාය අජ්ඣභාසි –
‘‘දූරෙ ඉතො බ්‍රාහ්මණි බ්‍රහ්මලොකො,
යස්සාහුතිං පග්ගණ්හාසි නිච්චං;
නෙතාදිසො බ්‍රාහ්මණි බ්‍රහ්මභක්ඛො,
කිං ජප්පසි බ්‍රහ්මපථං අජානං [අජානන්තී (සී. පී. ක.)].
‘‘එසො හි තෙ බ්‍රාහ්මණි බ්‍රහ්මදෙවො,
නිරූපධිකො අතිදෙවපත්තො;
අකිඤ්චනො භික්ඛු අනඤ්ඤපොසී,
යො තෙ සො [තෙ සො (සී. පී.), යො තෙ ස (?)] පිණ්ඩාය ඝරං පවිට්ඨො.
‘‘ආහුනෙය්‍යො වෙදගු භාවිතත්තො,
නරානං දෙවානඤ්ච දක්ඛිණෙය්‍යො;
බාහිත්වා පාපානි අනූපලිත්තො,
ඝාසෙසනං ඉරියති සීතිභූතො.
‘‘න තස්ස පච්ඡා න පුරත්ථමත්ථි,
සන්තො විධූමො අනිඝො නිරාසො;
නික්ඛිත්තදණ්ඩො තසථාවරෙසු,
සො ත්‍යාහුතිං භුඤ්ජතු අග්ගපිණ්ඩං.
‘‘විසෙනිභූතො උපසන්තචිත්තො,
නාගොව දන්තො චරති අනෙජො;
භික්ඛු සුසීලො සුවිමුත්තචිත්තො,
සො ත්‍යාහුතිං භුඤ්ජතු අග්ගපිණ්ඩං.
‘‘තස්මිං පසන්නා අවිකම්පමානා,
පතිට්ඨපෙහි දක්ඛිණං දක්ඛිණෙය්‍යෙ;
කරොහි පුඤ්ඤං සුඛමායතිකං,
දිස්වා මුනිං බ්‍රාහ්මණි ඔඝතිණ්ණ’’න්ති.
‘‘තස්මිං පසන්නා අවිකම්පමානා,
පතිට්ඨපෙසි දක්ඛිණං දක්ඛිණෙය්‍යෙ;
අකාසි පුඤ්ඤං සුඛමායතිකං,
දිස්වා මුනිං බ්‍රාහ්මණී ඔඝතිණ්ණ’’න්ති.