4. නන්දනසුත්තං

95. එකමන්තං ඨිතො ඛො නන්දනො දෙවපුත්තො භගවන්තං ගාථාය අජ්ඣභාසි –

‘‘පුච්ඡාමි තං ගොතම භූරිපඤ්ඤ,

අනාවටං භගවතො ඤාණදස්සනං;

කථංවිධං සීලවන්තං වදන්ති,

කථංවිධං පඤ්ඤවන්තං වදන්ති;

කථංවිධො දුක්ඛමතිච්ච ඉරියති,

කථංවිධං දෙවතා පූජයන්තී’’ති.

‘‘යො සීලවා පඤ්ඤවා භාවිතත්තො,

සමාහිතො ඣානරතො සතීමා;

සබ්බස්ස සොකා විගතා පහීනා,

ඛීණාසවො අන්තිමදෙහධාරී.

‘‘තථාවිධං සීලවන්තං වදන්ති,

තථාවිධං පඤ්ඤවන්තං වදන්ති;

තථාවිධො දුක්ඛමතිච්ච ඉරියති,

තථාවිධං දෙවතා පූජයන්තී’’ති.