6. නජීරතිසුත්තං

76. ‘‘කිං ජීරති කිං න ජීරති, කිංසු උප්පථොති වුච්චති;

කිංසු ධම්මානං පරිපන්ථො, කිංසු රත්තින්දිවක්ඛයො;

කිං මලං බ්‍රහ්මචරියස්ස, කිං සිනානමනොදකං.

‘‘කති ලොකස්මිං ඡිද්දානි, යත්ථ විත්තං [චිත්තං (සී. ස්‍යා. කං. පී.)] න තිට්ඨති;

භගවන්තං පුට්ඨුමාගම්ම, කථං ජානෙමු තං මය’’න්ති.

‘‘රූපං ජීරති මච්චානං, නාමගොත්තං න ජීරති;

රාගො උප්පථොති වුච්චති.

‘‘ලොභො ධම්මානං පරිපන්ථො, වයො රත්තින්දිවක්ඛයො;

ඉත්ථී මලං බ්‍රහ්මචරියස්ස, එත්ථායං සජ්ජතෙ පජා;

තපො ච බ්‍රහ්මචරියඤ්ච, තං සිනානමනොදකං.

‘‘ඡ ලොකස්මිං ඡිද්දානි, යත්ථ විත්තං න තිට්ඨති;

ආලස්‍යඤ්ච [ආලස්සඤ්ච (සී. පී.)] පමාදො ච, අනුට්ඨානං අසංයමො;

නිද්දා තන්දී [තන්දි (සී.)] ච තෙ ඡිද්දෙ, සබ්බසො තං විවජ්ජයෙ’’ති.