13. චූළරථවිමානවත්ථු

981. ‘‘දළ්හධම්මා නිසාරස්ස, ධනුං ඔලුබ්භ තිට්ඨසි;

ඛත්තියො නුසි රාජඤ්ඤො, අදු ලුද්දො වනෙචරො’’ති [වනාචරොති (ස්‍යා. ක.)].

982. ‘‘අස්සකාධිපතිස්සාහං, භන්තෙ පුත්තො වනෙචරො;

නාමං මෙ භික්ඛු තෙ බ්‍රූමි, සුජාතො ඉති මං විදූ [විදුං (සී.)].

983. ‘‘මිගෙ ගවෙසමානොහං, ඔගාහන්තො බ්‍රහාවනං;

මිගං තඤ්චෙව [මිගං ගන්ත්වෙව (ස්‍යා.), මිගවධඤ්ච (ක.)] නාද්දක්ඛිං, තඤ්ච දිස්වා ඨිතො අහ’’න්ති.

984. ‘‘ස්වාගතං තෙ මහාපුඤ්ඤ, අථො තෙ අදුරාගතං;

එත්තො උදකමාදාය, පාදෙ පක්ඛාලයස්සු තෙ.

985. ‘‘ඉදම්පි පානීයං සීතං, ආභතං ගිරිගබ්භරා;

රාජපුත්ත තතො පිත්වා [පීත්වා (සී. ස්‍යා.)], සන්ථතස්මිං උපාවිසා’’ති.

986. ‘‘කල්‍යාණී වත තෙ වාචා, සවනීයා මහාමුනි;

නෙලා අත්ථවතී [චත්ථවතී (සී.)] වග්ගු, මන්ත්වා [මන්තා (ස්‍යා. පී. ක.)] අත්ථඤ්ච භාසසි [භාසසෙ (සී.)].

987. ‘‘කා තෙ රති වනෙ විහරතො, ඉසිනිසභ වදෙහි පුට්ඨො;

තව වචනපථං නිසාමයිත්වා, අත්ථධම්මපදං සමාචරෙමසෙ’’ති.

988. ‘‘අහිංසා සබ්බපාණීනං, කුමාරම්හාක රුච්චති;

ථෙය්‍යා ච අතිචාරා ච, මජ්ජපානා ච ආරති.

989. ‘‘ආරති සමචරියා ච, බාහුසච්චං කතඤ්ඤුතා;

දිට්ඨෙව ධම්මෙ පාසංසා, ධම්මා එතෙ පසංසියාති.

990. ‘‘සන්තිකෙ මරණං තුය්හං, ඔරං මාසෙහි පඤ්චහි;

රාජපුත්ත විජානාහි, අත්තානං පරිමොචයා’’ති.

991. ‘‘කතමං ස්වාහං ජනපදං ගන්ත්වා, කිං කම්මං කිඤ්ච පොරිසං;

කාය වා පන විජ්ජාය, භවෙය්‍යං අජරාමරො’’ති.

992. ‘‘න විජ්ජතෙ සො පදෙසො, කම්මං විජ්ජා ච පොරිසං;

යත්ථ ගන්ත්වා භවෙ මච්චො, රාජපුත්තාජරාමරො.

993. ‘‘මහද්ධනා මහාභොගා, රට්ඨවන්තොපි ඛත්තියා;

පහූතධනධඤ්ඤාසෙ, තෙපි නො [තෙපි න (බහූසු)] අජරාමරා.

994. ‘‘යදි තෙ සුතා අන්ධකවෙණ්ඩුපුත්තා [අන්ධකවෙණ්හුපුත්තා (සී.), අණ්ඩකවෙණ්ඩපුත්තා (ස්‍යා. ක.)], සූරා වීරා වික්කන්තප්පහාරිනො;

තෙපි ආයුක්ඛයං පත්තා, විද්ධස්තා සස්සතීසමා.

995. ‘‘ඛත්තියා බ්‍රාහ්මණා වෙස්සා, සුද්දා චණ්ඩාලපුක්කුසා;

එතෙ චඤ්ඤෙ ච ජාතියා, තෙපි නො අජරාමරා.

996. ‘‘යෙ මන්තං පරිවත්තෙන්ති, ඡළඞ්ගං බ්‍රහ්මචින්තිතං;

එතෙ චඤ්ඤෙ ච විජ්ජාය, තෙපි නො අජරාමරා.

997. ‘‘ඉසයො චාපි යෙ සන්තා, සඤ්ඤතත්තා තපස්සිනො;

සරීරං තෙපි කාලෙන, විජහන්ති තපස්සිනො.

998. ‘‘භාවිතත්තාපි අරහන්තො, කතකිච්චා අනාසවා;

නික්ඛිපන්ති ඉමං දෙහං, පුඤ්ඤපාපපරික්ඛයා’’ති.

999. ‘‘සුභාසිතා අත්ථවතී, ගාථායො තෙ මහාමුනි;

නිජ්ඣත්තොම්හි සුභට්ඨෙන, ත්වඤ්ච මෙ සරණං භවා’’ති.

1000. ‘‘මා මං ත්වං සරණං ගච්ඡ, තමෙව සරණං වජ [භජ (ක.)];

සක්‍යපුත්තං මහාවීරං, යමහං සරණං ගතො’’ති.

1001. ‘‘කතරස්මිං සො ජනපදෙ, සත්ථා තුම්හාක මාරිස;

අහම්පි දට්ඨුං ගච්ඡිස්සං, ජිනං අප්පටිපුග්ගල’’න්ති.

1002. ‘‘පුරත්ථිමස්මිං ජනපදෙ, ඔක්කාකකුලසම්භවො;

තත්ථාසි පුරිසාජඤ්ඤො, සො ච ඛො පරිනිබ්බුතො’’ති.

1003. ‘‘සචෙ හි බුද්ධො තිට්ඨෙය්‍ය, සත්ථා තුම්හාක මාරිස;

යොජනානි සහස්සානි, ගච්ඡෙය්‍යං [ගච්ඡෙ (ස්‍යා. පී. ක.)] පයිරුපාසිතුං.

1004. ‘‘යතො ච ඛො [යතා ඛො (පී. ක.)] පරිනිබ්බුතො, සත්ථා තුම්හාක මාරිස;

නිබ්බුතම්පි [පරිනිබ්බුතං (ස්‍යා. ක.)] මහාවීරං, ගච්ඡාමි සරණං අහං.

1005. ‘‘උපෙමි සරණං බුද්ධං, ධම්මඤ්චාපි අනුත්තරං;

සඞ්ඝඤ්ච නරදෙවස්ස, ගච්ඡාමි සරණං අහං.

1006. ‘‘පාණාතිපාතා විරමාමි ඛිප්පං, ලොකෙ අදින්නං පරිවජ්ජයාමි;

අමජ්ජපො නො ච මුසා භණාමි, සකෙන දාරෙන ච හොමි තුට්ඨො’’ති.

1007. ‘‘සහස්සරංසීව යථා මහප්පභො, දිසං යථා භාති නභෙ අනුක්කමං;

තථාපකාරො [තථප්පකාරො (සී. ස්‍යා.)] තවායං [තවයං (සී. පී.)] මහාරථො, සමන්තතො යොජනසත්තමායතො.

1008. ‘‘සුවණ්ණපට්ටෙහි සමන්තමොත්ථටො, උරස්ස මුත්තාහි මණීහි චිත්තිතො;

ලෙඛා සුවණ්ණස්ස ච රූපියස්ස ච, සොභෙන්ති වෙළුරියමයා සුනිම්මිතා.

1009. ‘‘සීසඤ්චිදං වෙළුරියස්ස නිම්මිතං, යුගඤ්චිදං ලොහිතකාය චිත්තිතං;

යුත්තා සුවණ්ණස්ස ච රූපියස්ස ච, සොභන්ති අස්සා ච ඉමෙ මනොජවා.

1010. ‘‘සො තිට්ඨසි හෙමරථෙ අධිට්ඨිතො, දෙවානමින්දොව සහස්සවාහනො;

පුච්ඡාමි තාහං යසවන්ත කොවිදං [කොවිද (ක.)], කථං තයා ලද්ධො අයං උළාරො’’ති.

1011. ‘‘සුජාතො නාමහං භන්තෙ, රාජපුත්තො පුරෙ අහුං;

ත්වඤ්ච මං අනුකම්පාය, සඤ්ඤමස්මිං නිවෙසයි.

1012. ‘‘ඛීණායුකඤ්ච මං ඤත්වා, සරීරං පාදාසි සත්ථුනො;

ඉමං සුජාත පූජෙහි, තං තෙ අත්ථාය හෙහිති.

1013. ‘‘තාහං ගන්ධෙහි මාලෙහි, පූජයිත්වා සමුය්‍යුතො;

පහාය මානුසං දෙහං, උපපන්නොම්හි නන්දනං.

1014. ‘‘නන්දනෙ ච වනෙ [නන්දනොපවනෙ (සී.), නන්දනෙ පවනෙ (ස්‍යා. ක.)] රම්මෙ, නානාදිජගණායුතෙ;

රමාමි නච්චගීතෙහි, අච්ඡරාහි පුරක්ඛතො’’ති.

චූළරථවිමානං තෙරසමං.