10. පටාචාරාථෙරීගාථා

112. ‘‘නඞ්ගලෙහි කසං ඛෙත්තං, බීජානි පවපං ඡමා;

පුත්තදාරානි පොසෙන්තා, ධනං වින්දන්ති මාණවා.

113. ‘‘කිමහං සීලසම්පන්නා, සත්ථුසාසනකාරිකා;

නිබ්බානං නාධිගච්ඡාමි, අකුසීතා අනුද්ධතා.

114. ‘‘පාදෙ පක්ඛාලයිත්වාන, උදකෙසු කරොමහං;

පාදොදකඤ්ච දිස්වාන, ථලතො නින්නමාගතං.

115. ‘‘තතො චිත්තං සමාධෙසිං, අස්සං භද්‍රංවජානියං;

තතො දීපං ගහෙත්වාන, විහාරං පාවිසිං අහං;

සෙය්‍යං ඔලොකයිත්වාන, මඤ්චකම්හි උපාවිසිං.

116. ‘‘තතො සූචිං ගහෙත්වාන, වට්ටිං ඔකස්සයාමහං;

පදීපස්සෙව නිබ්බානං, විමොක්ඛො අහු චෙතසො’’ති.

… පටාචාරා ථෙරී….