නමො තස්ස භගවතො අරහතො සම්මාසම්බුද්ධස්ස

ඛුද්දකනිකායෙ

ථෙරීගාථාපාළි

1. එකකනිපාතො

1. අඤ්ඤතරාථෙරීගාථා

1. ‘‘සුඛං සුපාහි ථෙරිකෙ, කත්වා චොළෙන පාරුතා;

උපසන්තො හි තෙ රාගො, සුක්ඛඩාකං ව කුම්භිය’’න්ති.

ඉත්ථං සුදං අඤ්ඤතරා ථෙරී අපඤ්ඤාතා භික්ඛුනී ගාථං අභාසිත්ථාති.

2. මුත්තාථෙරීගාථා

2. ‘‘මුත්තෙ මුච්චස්සු යොගෙහි, චන්දො රාහුග්ගහා ඉව;

විප්පමුත්තෙන චිත්තෙන, අනණා භුඤ්ජ පිණ්ඩක’’න්ති.

ඉත්ථං සුදං භගවා මුත්තං සික්ඛමානං ඉමාය ගාථාය අභිණ්හං ඔවදතීති.

3. පුණ්ණාථෙරීගාථා

3. ‘‘පුණ්ණෙ පූරස්සු ධම්මෙහි, චන්දො පන්නරසෙරිව;

පරිපුණ්ණාය පඤ්ඤාය, තමොඛන්ධං [තමොක්ඛන්ධං (සී. ස්‍යා.)] පදාලයා’’ති.

ඉත්ථං සුදං පුණ්ණා ථෙරී ගාථං අභාසිත්ථාති.

4. තිස්සාථෙරීගාථා

4. ‘‘තිස්සෙ සික්ඛස්සු සික්ඛාය, මා තං යොගා උපච්චගුං;

සබ්බයොගවිසංයුත්තා, චර ලොකෙ අනාසවා’’ති.

… තිස්සා ථෙරී….

5. අඤ්ඤතරාතිස්සාථෙරීගාථා

5. ‘‘තිස්සෙ යුඤ්ජස්සු ධම්මෙහි, ඛණො තං මා උපච්චගා;

ඛණාතීතා හි සොචන්ති, නිරයම්හි සමප්පිතා’’ති.

… අඤ්ඤතරා තිස්සා ථෙරී….

6. ධීරාථෙරීගාථා

6. ‘‘ධීරෙ නිරොධං ඵුසෙහි [ඵුස්සෙහි (සී.)], සඤ්ඤාවූපසමං සුඛං;

ආරාධයාහි නිබ්බානං, යොගක්ඛෙමමනුත්තර’’න්ති [යොගක්ඛෙමං අනුත්තරන්ති (සී. ස්‍යා.)].

… ධීරා ථෙරී….

7. වීරාථෙරීගාථා

7. ‘‘වීරා වීරෙහි [ධීරා ධීරෙහි (ක.)] ධම්මෙහි, භික්ඛුනී භාවිතින්ද්‍රියා;

ධාරෙහි අන්තිමං දෙහං, ජෙත්වා මාරං සවාහිනි’’න්ති [සවාහනන්ති (ක.)].

… වීරා ථෙරී….

8. මිත්තාථෙරීගාථා

8. ‘‘සද්ධාය පබ්බජිත්වාන, මිත්තෙ මිත්තරතා භව;

භාවෙහි කුසලෙ ධම්මෙ, යොගක්ඛෙමස්ස පත්තියා’’ති.

… මිත්තා ථෙරී….

9. භද්‍රාථෙරීගාථා

9. ‘‘සද්ධාය පබ්බජිත්වාන, භද්‍රෙ භද්‍රරතා භව;

භාවෙහි කුසලෙ ධම්මෙ, යොගක්ඛෙමමනුත්තර’’න්ති.

… භද්‍රා ථෙරී….

10. උපසමාථෙරීගාථා

10. ‘‘උපසමෙ තරෙ ඔඝං, මච්චුධෙය්‍යං සුදුත්තරං;

ධාරෙහි අන්තිමං දෙහං, ජෙත්වා මාරං සවාහන’’න්ති.

… උපසමා ථෙරී….

11. මුත්තාථෙරීගාථා

11. ‘‘සුමුත්තා සාධුමුත්තාම්හි, තීහි ඛුජ්ජෙහි මුත්තියා;

උදුක්ඛලෙන මුසලෙන, පතිනා ඛුජ්ජකෙන ච;

මුත්තාම්හි ජාතිමරණා, භවනෙත්ති සමූහතා’’ති.

… මුත්තා ථෙරී….

12. ධම්මදින්නාථෙරීගාථා

12. ‘‘ඡන්දජාතා අවසායී, මනසා ච ඵුටා [ඵුට්ඨා (ස්‍යා.), ඵුඨා (සී. අට්ඨ.)] සියා;

කාමෙසු අප්පටිබද්ධචිත්තා [අප්පටිබන්ධචිත්තා (ක.)], උද්ධංසොතාති වුච්චතී’’ති [උද්ධංසොතා විමුච්චතීති (සී. පී.)].

… ධම්මදින්නා ථෙරී….

13.විසාඛාථෙරීගාථා

13. ‘‘කරොථ බුද්ධසාසනං, යං කත්වා නානුතප්පති;

ඛිප්පං පාදානි ධොවිත්වා, එකමන්තෙ නිසීදථා’’ති.

… විසාඛා ථෙරී….

14.සුමනාථෙරීගාථා

14. ‘‘ධාතුයො දුක්ඛතො දිස්වා, මා ජාතිං පුනරාගමි;

භවෙ ඡන්දං විරාජෙත්වා, උපසන්තා චරිස්සසී’’ති.

… සුමනා ථෙරී….

15. උත්තරාථෙරීගාථා

15. ‘‘කායෙන සංවුතා ආසිං, වාචාය උද චෙතසා;

සමූලං තණ්හමබ්බුය්හ, සීතිභූතාම්හි නිබ්බුතා’’ති.

… උත්තරා ථෙරී….

16. වුඩ්ඪපබ්බජිතසුමනාථෙරීගාථා

16. ‘‘සුඛං ත්වං වුඩ්ඪිකෙ සෙහි, කත්වා චොළෙන පාරූතා;

උපසන්තො හි තෙ රාගො, සීතිභූතාසි නිබ්බුතා’’ති.

… සුමනා වුඩ්ඪපබ්බජිතා ථෙරී….

17. ධම්මාථෙරීගාථා

17. ‘‘පිණ්ඩපාතං චරිත්වාන, දණ්ඩමොලුබ්භ දුබ්බලා;

වෙධමානෙහි ගත්තෙහි, තත්ථෙව නිපතිං ඡමා;

දිස්වා ආදීනවං කායෙ, අථ චිත්තං විමුච්චි මෙ’’ති.

… ධම්මා ථෙරී….

18. සඞ්ඝාථෙරීගාථා

18. ‘‘හිත්වා ඝරෙ පබ්බජිත්වා [පබ්බජිතා (සී. අට්ඨ.)], හිත්වා පුත්තං පසුං පියං;

හිත්වා රාගඤ්ච දොසඤ්ච, අවිජ්ජඤ්ච විරාජිය;

සමූලං තණ්හමබ්බුය්හ, උපසන්තාම්හි නිබ්බුතා’’ති.

… සඞ්ඝා ථෙරී….

එකකනිපාතො නිට්ඨිතො.

2. දුකනිපාතො

1. අභිරූපනන්දාථෙරීගාථා

19. [අප. ථෙරී 2.4.157 අපදානෙපි] ‘‘ආතුරං අසුචිං පූතිං, පස්ස නන්දෙ සමුස්සයං;

අසුභාය චිත්තං භාවෙහි, එකග්ගං සුසමාහිතං.

20. ‘‘අනිමිත්තඤ්ච භාවෙහි, මානානුසයමුජ්ජහ;

තතො මානාභිසමයා, උපසන්තා චරිස්සසී’’ති.

ඉත්ථං සුදං භගවා අභිරූපනන්දං සික්ඛමානං ඉමාහි ගාථාහි අභිණ්හං ඔවදතීති [ඉත්ථං සුදං භගවා අභිරූපනන්දං සික්ඛමානං ඉමාහි ගාථාහි අභිණ්හං ඔවදතීති (ක.)].

2. ජෙන්තාථෙරීගාථා

21. ‘‘යෙ ඉමෙ සත්ත බොජ්ඣඞ්ගා, මග්ගා නිබ්බානපත්තියා;

භාවිතා තෙ මයා සබ්බෙ, යථා බුද්ධෙන දෙසිතා.

22. ‘‘දිට්ඨො හි මෙ සො භගවා, අන්තිමොයං සමුස්සයො;

වික්ඛීණො ජාතිසංසාරො, නත්ථි දානි පුනබ්භවො’’ති.

ඉත්ථං සුදං ජෙන්තා ථෙරී ගාථායො අභාසිත්ථාති.

3. සුමඞ්ගලමාතාථෙරීගාථා

23. ‘‘සුමුත්තිකා සුමුත්තිකා [සුමුත්තිකෙ සුමුත්තිකෙ (සී.), සුමුත්තිකෙ සුමුත්තිකා (ස්‍යා. ක.)], සාධුමුත්තිකාම්හි මුසලස්ස;

අහිරිකො මෙ ඡත්තකං වාපි, උක්ඛලිකා මෙ දෙඩ්ඩුභං වාති.

24. ‘‘රාගඤ්ච අහං දොසඤ්ච, චිච්චිටි චිච්චිටීති විහනාමි;

සා රුක්ඛමූලමුපගම්ම, අහො සුඛන්ති සුඛතො ඣායාමී’’ති.

… සුමඞ්ගලමාතා ථෙරී [අඤ්ඤතරා ථෙරී භික්ඛුනී අපඤ්ඤාතා (ස්‍යා. ක.)].

4. අඩ්ඪකාසිථෙරීගාථා

25. ‘‘යාව කාසිජනපදො, සුඞ්කො මෙ තත්ථකො අහු;

තං කත්වා නෙගමො අග්ඝං, අඩ්ඪෙනග්ඝං ඨපෙසි මං.

26. ‘‘අථ නිබ්බින්දහං රූපෙ, නිබ්බින්දඤ්ච විරජ්ජහං;

මා පුන ජාතිසංසාරං, සන්ධාවෙය්‍යං පුනප්පුනං;

තිස්සො විජ්ජා සච්ඡිකතා, කතං බුද්ධස්ස සාසන’’න්ති.

… අඩ්ඪකාසි ථෙරී….

5. චිත්තාථෙරීගාථා

27. ‘‘කිඤ්චාපි ඛොම්හි කිසිකා, ගිලානා බාළ්හදුබ්බලා;

දණ්ඩමොලුබ්භ ගච්ඡාමි, පබ්බතං අභිරූහිය.

28. ‘‘සඞ්ඝාටිං නික්ඛිපිත්වාන, පත්තකඤ්ච නිකුජ්ජිය;

සෙලෙ ඛම්භෙසිමත්තානං, තමොඛන්ධං පදාලියා’’ති.

… චිත්තා ථෙරී….

6. මෙත්තිකාථෙරීගාථා

29. ‘‘කිඤ්චාපි ඛොම්හි දුක්ඛිතා, දුබ්බලා ගතයොබ්බනා;

දණ්ඩමොලුබ්භ ගච්ඡාමි, පබ්බතං අභිරූහිය.

30. ‘‘නික්ඛිපිත්වාන සඞ්ඝාටිං, පත්තකඤ්ච නිකුජ්ජිය;

නිසින්නා චම්හි සෙලම්හි, අථ චිත්තං විමුච්චි මෙ;

තිස්සො විජ්ජා අනුප්පත්තා, කතං බුද්ධස්ස සාසන’’න්ති.

… මෙත්තිකා ථෙරී….

7. මිත්තාථෙරීගාථා

31. ‘‘චාතුද්දසිං පඤ්චදසිං, යා ච පක්ඛස්ස අට්ඨමී;

පාටිහාරියපක්ඛඤ්ච, අට්ඨඞ්ගසුසමාගතං.

32. ‘‘උපොසථං උපාගච්ඡිං, දෙවකායාභිනන්දිනී;

සාජ්ජ එකෙන භත්තෙන, මුණ්ඩා සඞ්ඝාටිපාරුතා;

දෙවකායං න පත්ථෙහං, විනෙය්‍ය හදයෙ දර’’න්ති.

… මිත්තා ථෙරී….

8. අභයමාතුථෙරීගාථා

33. ‘‘උද්ධං පාදතලා අම්ම, අධො වෙ කෙසමත්ථකා;

පච්චවෙක්ඛස්සුමං කායං, අසුචිං පූතිගන්ධිකං.

34. ‘‘එවං විහරමානාය, සබ්බො රාගො සමූහතො;

පරිළාහො සමුච්ඡින්නො, සීතිභූතාම්හි නිබ්බුතා’’ති.

… අභයමාතු ථෙරී….

9. අභයාථෙරීගාථා

35. ‘‘අභයෙ භිදුරො කායො, යත්ථ සතා පුථුජ්ජනා;

නික්ඛිපිස්සාමිමං දෙහං, සම්පජානා සතීමතී.

36. ‘‘බහූහි දුක්ඛධම්මෙහි, අප්පමාදරතාය මෙ;

තණ්හක්ඛයො අනුප්පත්තො, කතං බුද්ධස්ස සාසන’’න්ති.

… අභයා ථෙරී….

10. සාමාථෙරීගාථා

37. ‘‘චතුක්ඛත්තුං පඤ්චක්ඛත්තුං, විහාරා උපනික්ඛමිං;

අලද්ධා චෙතසො සන්තිං, චිත්තෙ අවසවත්තිනී;

තස්සා මෙ අට්ඨමී රත්ති, යතො තණ්හා සමූහතා.

38. ‘‘බහූහි දුක්ඛධම්මෙහි, අප්පමාදරතාය මෙ;

තණ්හක්ඛයො අනුප්පත්තො, කතං බුද්ධස්ස සාසන’’න්ති.

… සාමා ථෙරී….

දුකනිපාතො නිට්ඨිතො.

3. තිකනිපාතො

1. අපරාසාමාථෙරීගාථා

39. ‘‘පණ්ණවීසතිවස්සානි, යතො පබ්බජිතාය මෙ;

නාභිජානාමි චිත්තස්ස, සමං ලද්ධං කුදාචනං.