6. අභිරූපනන්දාථෙරීඅපදානං

143. ‘‘එකනවුතිතො කප්පෙ, විපස්සී නාම නායකො;

උප්පජ්ජි චාරුදස්සනො, සබ්බධම්මෙසු චක්ඛුමා.

144. ‘‘තදාහං බන්ධුමතියං, ඉද්ධෙ ඵීතෙ මහාකුලෙ;

ජාතා සුරූපා දයිතා, පූජනීයා ජනස්ස ච.

145. ‘‘උපගන්ත්වා මහාවීරං, විපස්සිං ලොකනායකං;

ධම්මං සුණිත්වා සරණං, උපෙසිං නරනායකං.

146. ‘‘සීලෙසු සංවුතා හුත්වා, නිබ්බුතෙ ච නරුත්තමෙ;

ධාතුථූපස්ස උපරි, සොණ්ණච්ඡත්තමපූජයිං.

147. ‘‘මුත්තචාගා සීලවතී, යාවජීවං තතො චුතා;

ජහිත්වා මානුසං දෙහං, තාවතිංසූපගා අහං.

148. ‘‘තදා දසහි ඨානෙහි, අධිභොත්වාන සෙසකෙ [අධිභොත්වා අසෙසතො (ස්‍යා.)];

රූපසද්දෙහි ගන්ධෙහි, රසෙහි ඵුසනෙහි ච.

149. ‘‘ආයුනාපි ච වණ්ණෙන, සුඛෙන යසසාපි ච;

තථෙවාධිපතෙය්‍යෙන, අධිගය්හ විරොචහං.

150. ‘‘පච්ඡිමෙ ච භවෙ දානි, ජාතාහං කපිලව්හයෙ;

ධීතා ඛෙමකසක්කස්ස, නන්දා නාමාති විස්සුතා.

151. ‘‘අභිරූපසම්පදම්පි [අභිරුපං උපපදං (සී.), අභිරුපං උප්පාදං (පී.)], අහු මෙ කන්තිසූචකං;

යදාහං යොබ්බනප්පත්තා, රූපලාවඤ්ඤභූසිතා.

152. ‘‘තදා [තදා මමත්ථං (සී.), ඉධ මමත්තෙ (ස්‍යා. ක.)] මත්ථෙ සක්‍යානං, විවාදො සුමහා අහු;

පබ්බාජෙසි තතො තාතො, මා සක්‍යා විනස්සිංසුති.

153. ‘‘පබ්බජිත්වා තථාගතං, රූපදෙස්සිං නරුත්තමං;

සුත්වාන නොපගච්ඡාමි, මම රූපෙන ගබ්බිතා.

154. ‘‘ඔවාදම්පි න ගච්ඡාමි, බුද්ධදස්සනභීරුතා;

තදා ජිනො උපායෙන, උපනෙත්වා සසන්තිකං.

155. ‘‘තිස්සිත්ථියො [තිස්සො ථීයො (සී. පී.)] නිදස්සෙසි, ඉද්ධියා මග්ගකොවිදො;

අච්ඡරාරූපසදිසං, තරුණිං ජරිතං [ජරිකං (ස්‍යා. ක.)] මතං.

156. ‘‘තායො දිස්වා සුසංවිග්ගා, විරත්තාසෙ කළෙවරෙ;

අට්ඨාසිං භවනිබ්බින්දා, තදා මං ආහ නායකො.

157. ‘‘‘ආතුරං අසුචිං පූතිං, පස්ස නන්දෙ සමුස්සයං;

උග්ඝරන්තං පග්ඝරන්තං, බාලානං අභිනන්දිතං.

158. ‘‘‘අසුභාය චිත්තං භාවෙහි, එකග්ගං සුසමාහිතං;

යථා ඉදං තථා එතං, යථා එතං තථා ඉදං.

159. ‘‘‘එවමෙතං අවෙක්ඛන්තී, රත්තින්දිවමතන්දිතා;

තතො සකාය පඤ්ඤාය, අභිනිබ්බිජ්ඣ වච්ඡසි’.

160. ‘‘තස්සා මෙ අප්පමත්තාය, විචරන්තියා [විචරන්ත්වාධ (සී.), විචිනන්තීධ (ස්‍යා. පී.)] යොනිසො;

යථාභූතං අයං කායො, දිට්ඨො සන්තරබාහිරො.

161. ‘‘අථ නිබ්බින්දහං කායෙ, අජ්ඣත්තඤ්ච විරජ්ජහං;

අප්පමත්තා විසංයුත්තා, උපසන්තාම්හි නිබ්බුතා.

162. ‘‘ඉද්ධීසු ච වසී හොමි, දිබ්බාය සොතධාතුයා;

චෙතොපරියඤාණස්ස, වසී හොමි මහාමුනෙ.

163. ‘‘පුබ්බෙනිවාසං ජානාමි, දිබ්බචක්ඛු විසොධිතං;

සබ්බාසවපරික්ඛීණා, නත්ථි දානි පුනබ්භවො.

164. ‘‘අත්ථධම්මනිරුත්තීසු, පටිභානෙ තථෙව ච;

ඤාණං මම මහාවීර, උප්පන්නං තව සන්තිකෙ.

165. ‘‘කිලෙසා ඣාපිතා මය්හං…පෙ… විහරාමි අනාසවා.

166. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

167. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං අභිරූපනන්දා භික්ඛුනී ඉමා ගාථායො අභාසිත්ථාති.

අභිරූපනන්දාථෙරියාපදානං ඡට්ඨං.