9. පඤ්චදීපිකාථෙරීඅපදානං

91. ‘‘නගරෙ හංසවතියා, චාරිකී [චාරිනිං (ස්‍යා.)] ආසහං තදා;

ආරාමෙන ච ආරාමං, චරාමි කුසලත්ථිකා.

92. ‘‘කාළපක්ඛම්හි දිවසෙ, අද්දසං බොධිමුත්තමං;

තත්ථ චිත්තං පසාදෙත්වා, බොධිමූලෙ නිසීදහං.

93. ‘‘ගරුචිත්තං උපට්ඨෙත්වා, සිරෙ කත්වාන අඤ්ජලිං;

සොමනස්සං පවෙදෙත්වා, එවං චින්තෙසි තාවදෙ.

94. ‘‘‘යදි බුද්ධො අමිතගුණො, අසමප්පටිපුග්ගලො;

දස්සෙතු පාටිහීරං මෙ, බොධි ඔභාසතු අයං’.

95. ‘‘සහ ආවජ්ජිතෙ මය්හං, බොධි පජ්ජලි තාවදෙ;

සබ්බසොණ්ණමයා ආසි, දිසා සබ්බා විරොචති.

96. ‘‘සත්තරත්තින්දිවං [සත්තරත්තිදිවං (පී. ක.)] තත්ථ, බොධිමූලෙ නිසීදහං;

සත්තමෙ දිවසෙ පත්තෙ, දීපපූජං අකාසහං.

97. ‘‘ආසනං පරිවාරෙත්වා, පඤ්චදීපානි පජ්ජලුං;

යාව උදෙති සූරියො, දීපා මෙ පජ්ජලුං තදා.

98. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

99. ‘‘තත්ථ මෙ සුකතං බ්‍යම්හං, පඤ්චදීපාති වුච්චති;

සට්ඨියොජනමුබ්බෙධං [සතයොජනමුබ්බෙධං (සී. ස්‍යා. පී.)], තිංසයොජනවිත්ථතං [සට්ඨි… (ස්‍යා. පී.)].

100. ‘‘අසඞ්ඛියානි දීපානි, පරිවාරෙ ජලන්ති මෙ;

යාවතා දෙවභවනං, දීපාලොකෙන ජොතති.

101. ‘‘පරම්මුඛා නිසීදිත්වා [පුරත්ථාභිමුඛා සන්ති (ස්‍යා.), පුරත්ථාභිමුඛා ථිතා (පී.)], යදි ඉච්ඡාමි පස්සිතුං;

උද්ධං අධො ච තිරියං, සබ්බං පස්සාමි චක්ඛුනා.

102. ‘‘යාවතා අභිකඞ්ඛාමි, දට්ඨුං සුගතදුග්ගතෙ [සුකතදුක්කතෙ (පී.];

තත්ථ ආවරණං නත්ථි, රුක්ඛෙසු පබ්බතෙසු වා.

103. ‘‘අසීති දෙවරාජූනං, මහෙසිත්තමකාරයිං;

සතානං චක්කවත්තීනං, මහෙසිත්තමකාරයිං.

104. ‘‘යං යං යොනුපපජ්ජාමි, දෙවත්තං අථ මානුසං;

දීපසතසහස්සානි, පරිවාරෙ ජලන්ති මෙ.

105. ‘‘දෙවලොකා චවිත්වාන, උප්පජ්ජිං මාතුකුච්ඡියං;

මාතුකුච්ඡිගතා සන්තී [මාතුකුච්ඡිගතං සන්තිං (සී.)], අක්ඛි මෙ න නිමීලති.

106. ‘‘දීපසතසහස්සානි, පුඤ්ඤකම්මසමඞ්ගිතා;

ජලන්ති සූතිකාගෙහෙ [සූතිඝරෙ පජ්ජලන්ති (සබ්බත්ථ)], පඤ්චදීපානිදං ඵලං.

107. ‘‘පච්ඡිමෙ භවෙ සම්පත්තෙ, මානසං විනිවත්තයිං;

අජරාමතං සීතිභාවං, නිබ්බානං ඵස්සයිං අහං.

108. ‘‘ජාතියා සත්තවස්සාහං, අරහත්තමපාපුණිං;

උපසම්පාදයී බුද්ධො, ගුණමඤ්ඤාය ගොතමො.

109. ‘‘මණ්ඩපෙ රුක්ඛමූලෙ වා, පාසාදෙසු ගුහාසු වා;

සුඤ්ඤාගාරෙ වසන්තියා [ච ඣායන්තෙ (සී.), ච ඣායන්තා (පී.), පජ්ඣායන්තා (ස්‍යා.)], පඤ්චදීපා ජලන්ති මෙ.

110. ‘‘දිබ්බචක්ඛු විසුද්ධං මෙ, සමාධිකුසලා අහං;

අභිඤ්ඤාපාරමිප්පත්තා, පඤ්චදීපානිදං ඵලං.

111. ‘‘සබ්බවොසිතවොසානා, කතකිච්චා අනාසවා;

පඤ්චදීපා මහාවීර, පාදෙ වන්දාමි [වන්දති (සී. ක.)] චක්ඛුම.

112. ‘‘සතසහස්සිතො කප්පෙ, යං දීපමදදිං තදා;

දුග්ගතිං නාභිජානාමි, පඤ්චදීපානිදං ඵලං.

113. ‘‘කිලෙසා ඣාපිතා මය්හං…පෙ… විහරාමි අනාසවා.

114. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

115. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං පඤ්චදීපිකා භික්ඛුනී ඉමා ගාථායො අභාසිත්ථාති.

පඤ්චදීපිකාථෙරියාපදානං නවමං.