10. උදකදායිකාථෙරීඅපදානං

116. ‘‘නගරෙ බන්ධුමතියා, අහොසිං උදහාරිකා;

උදහාරෙන ජීවාමි, තෙන පොසෙමි දාරකෙ.

117. ‘‘දෙය්‍යධම්මො ච මෙ නත්ථි, පුඤ්ඤක්ඛෙත්තෙ අනුත්තරෙ;

කොට්ඨකං උපසඞ්කම්ම, උදකං පට්ඨපෙසහං.

118. ‘‘තෙන කම්මෙන සුකතෙන, තාවතිංසමගච්ඡහං;

තත්ථ මෙ සුකතං බ්‍යම්හං, උදහාරෙන නිම්මිතං.

119. ‘‘අච්ඡරානං සහස්සස්ස, අහඤ්හි පවරා තදා;

දසට්ඨානෙහි තා සබ්බා, අභිභොමි සදා අහං.

120. ‘‘පඤ්ඤාසං දෙවරාජූනං, මහෙසිත්තමකාරයිං;

වීසතිචක්කවත්තීනං, මහෙසිත්තමකාරයිං.

121. ‘‘දුවෙ භවෙ සංසරාමි, දෙවත්තෙ අථ මානුසෙ;

දුග්ගතිං නාභිජානාමි, දකදානස්සිදං ඵලං.

122. ‘‘පබ්බතග්ගෙ දුමග්ගෙ වා, අන්තලික්ඛෙ ච භූමියං;

යදා උදකමිච්ඡාමි, ඛිප්පං පටිලභාමහං.

123. ‘‘අවුට්ඨිකා දිසා නත්ථි, සන්තත්තා කුථිතාපි [සන්තත්තා කුථිතා න ච (සී. පී.), සන්තත්තා ඛුප්පිතා හි මෙ (ස්‍යා.)] ච;

මම සඞ්කප්පමඤ්ඤාය, මහාමෙඝො පවස්සති.

124. ‘‘කදාචි නීයමානාය, ඤාතිසඞ්ඝෙන මෙ තදා;

යදා ඉච්ඡාමහං වස්සං, මහාමෙඝො අජායථ.

125. ‘‘උණ්හං වා පරිළාහො වා, සරීරෙ මෙ න විජ්ජති;

කායෙ ච මෙ රජො නත්ථි, දකදානස්සිදං ඵලං.

126. ‘‘විසුද්ධමනසා අජ්ජ, අපෙතමනපාපිකා;

සබ්බාසවපරික්ඛීණා, නත්ථි දානි පුනබ්භවො.

127. ‘‘එකනවුතිතො කප්පෙ, යං දකං අදදිං තදා;

දුග්ගතිං නාභිජානාමි, දකදානස්සිදං ඵලං.

128. ‘‘කිලෙසා ඣාපිතා මය්හං…පෙ… විහරාමි අනාසවා.

129. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

130. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං උදකදායිකා භික්ඛුනී ඉමා ගාථායො අභාසිත්ථාති.

උදකදායිකාථෙරියාපදානං දසමං.

සුමෙධාවග්ගො පඨමො.