10. සිරිමත්ථෙරගාථා

159. ‘‘පරෙ ච නං පසංසන්ති, අත්තා චෙ අසමාහිතො;

මොඝං පරෙ පසංසන්ති, අත්තා හි අසමාහිතො.

160. ‘‘පරෙ ච නං ගරහන්ති, අත්තා චෙ සුසමාහිතො;

මොඝං පරෙ ගරහන්ති, අත්තා හි සුසමාහිතො’’ති.

… සිරිමා ථෙරො….

වග්ගො දුතියො නිට්ඨිතො.

තස්සුද්දානං –

චුන්දො ච ජොතිදාසො ච, ථෙරො හෙරඤ්ඤකානි ච;

සොමමිත්තො සබ්බමිත්තො, කාලො තිස්සො ච කිමිලො [කිම්බිලො (සී. ස්‍යා. පී.), ඡන්දලක්ඛණානුලොමං];

නන්දො ච සිරිමා චෙව, දස ථෙරා මහිද්ධිකාති.