4. චතුත්ථවග්ගො

31. ‘‘ඵුට්ඨො ඩංසෙහි මකසෙහි, අරඤ්ඤස්මිං බ්‍රහාවනෙ;

නාගො සංගාමසීසෙව, සතො තත්‍රාධිවාසයෙ’’ති.

… ගහ්වරතීරියො ථෙරො….

32. ‘‘අජරං ජීරමානෙන, තප්පමානෙන නිබ්බුතිං;

නිමියං [නිම්මිස්සං (සී.), නිරාමිසං (ස්‍යා.), නිමිනෙය්‍යං (?)] පරමං සන්තිං, යොගක්ඛෙමං අනුත්තර’’න්ති.

… සුප්පියො ථෙරො….

33. ‘‘යථාපි එකපුත්තස්මිං, පියස්මිං කුසලී සියා;

එවං සබ්බෙසු පාණෙසු, සබ්බත්ථ කුසලො සියා’’ති.

… සොපාකො ථෙරො….

34. ‘‘අනාසන්නවරා එතා, නිච්චමෙව විජානතා;

ගාමා අරඤ්ඤමාගම්ම, තතො ගෙහං උපාවිසි [උපාවිසිං (සී.)];

තතො උට්ඨාය පක්කාමි, අනාමන්තෙත්වා [අනාමන්තිය (සී.)] පොසියො’’ති.

… පොසියො ථෙරො….

35. ‘‘සුඛං සුඛත්ථො ලභතෙ තදාචරං, කිත්තිඤ්ච පප්පොති යසස්ස වඩ්ඪති;

යො අරියමට්ඨඞ්ගිකමඤ්ජසං උජුං, භාවෙති මග්ගං අමතස්ස පත්තියා’’ති.

… සාමඤ්ඤකානිත්ථෙරො….

36. ‘‘සාධු සුතං සාධු චරිතකං, සාධු සදා අනිකෙතවිහාරො;

අත්ථපුච්ඡනං පදක්ඛිණකම්මං, එතං සාමඤ්ඤමකිඤ්චනස්සා’’ති.

… කුමාපුත්තො ථෙරො….

37. ‘‘නානාජනපදං යන්ති, විචරන්තා අසඤ්ඤතා;

සමාධිඤ්ච විරාධෙන්ති, කිංසු රට්ඨචරියා කරිස්සති;

තස්මා විනෙය්‍ය සාරම්භං, ඣායෙය්‍ය අපුරක්ඛතො’’ති.

… කුමාපුත්තත්ථෙරස්ස සහායකො ථෙරො….

38. ‘‘යො ඉද්ධියා සරභුං අට්ඨපෙසි, සො ගවම්පති අසිතො අනෙජො;

තං සබ්බසඞ්ගාතිගතං මහාමුනිං, දෙවා නමස්සන්ති භවස්ස පාරගු’’න්ති.

… ගවම්පතිත්ථෙරො….

39. [සං. නි. 1.21, 97]‘‘සත්තියා විය ඔමට්ඨො, ඩය්හමානොව [ඩය්හමානෙව (සබ්බත්ථ)] මත්ථකෙ;

කාමරාගප්පහානාය, සතො භික්ඛු පරිබ්බජෙ’’ති.

… තිස්සො ථෙරො….

40. ‘‘සත්තියා විය ඔමට්ඨො, ඩය්හමානොව මත්ථකෙ;

භවරාගප්පහානාය, සතො භික්ඛු පරිබ්බජෙ’’ති.

… වඩ්ඪමානො ථෙරො….

වග්ගො චතුත්ථො නිට්ඨිතො.

තස්සුද්දානං –

ගහ්වරතීරියො සුප්පියො, සොපාකො චෙව පොසියො;

සාමඤ්ඤකානි කුමාපුත්තො, කුමාපුත්තසහායකො;

ගවම්පති තිස්සත්ථෙරො, වඩ්ඪමානො මහායසොති.