5. පඤ්චමවග්ගො

41. ‘‘විවරමනුපතන්ති විජ්ජුතා, වෙභාරස්ස ච පණ්ඩවස්ස ච;

නගවිවරගතො ච ඣායති, පුත්තො අප්පටිමස්ස තාදිනො’’ති.

… සිරිවඩ්ඪො ථෙරො….

42. ‘‘චාලෙ උපචාලෙ සීසූපචාලෙ ( ) [(චාලා උපචාලා, සීසූපචාලා) (ක.)] පතිස්සතා [පටිස්සතිකා (ස්‍යා. ක.)] නු ඛො විහරථ;

ආගතො වො වාලං විය වෙධී’’ති.

… ඛදිරවනියො ථෙරො….

43. ‘‘සුමුත්තිකො සුමුත්තිකො සාහු, සුමුත්තිකොම්හි තීහි ඛුජ්ජකෙහි;

අසිතාසු මයා නඞ්ගලාසු, මයා ඛුද්දකුද්දාලාසු මයා.

යදිපි ඉධමෙව ඉධමෙව, අථ වාපි අලමෙව අලමෙව;

ඣාය සුමඞ්ගල ඣාය සුමඞ්ගල, අප්පමත්තො විහර සුමඞ්ගලා’’ති.

… සුමඞ්ගලො ථෙරො….

44. [සං. නි. 1.239] ‘‘මතං වා අම්ම රොදන්ති, යො වා ජීවං න දිස්සති;

ජීවන්තං මං අම්ම පස්සන්තී, කස්මා මං අම්ම රොදසී’’ති.

… සානුත්ථෙරො….

45. ‘‘යථාපි භද්දො ආජඤ්ඤො, ඛලිත්වා පතිතිට්ඨති;

එවං දස්සනසම්පන්නං, සම්මාසම්බුද්ධසාවක’’න්ති.

… රමණීයවිහාරිත්ථෙරො….

46. ‘‘සද්ධායාහං පබ්බජිතො, අගාරස්මානගාරියං;

සති පඤ්ඤා ච මෙ වුඩ්ඪා, චිත්තඤ්ච සුසමාහිතං;

කාමං කරස්සු රූපානි, නෙව මං බ්‍යාධයිස්සසී’’ති [බාධයිස්සසීති (සී.), බ්‍යාථයිස්සසීති (?)].

… සමිද්ධිත්ථෙරො….

47. ‘‘නමො තෙ බුද්ධ වීරත්ථු, විප්පමුත්තොසි සබ්බධි;

තුය්හාපදානෙ විහරං, විහරාමි අනාසවො’’ති.

… උජ්ජයො ථෙරො….

48. ‘‘යතො අහං පබ්බජිතො, අගාරස්මානගාරියං;

නාභිජානාමි සඞ්කප්පං, අනරියං දොසසංහිත’’න්ති.

… සඤ්ජයො ථෙරො….

49. ‘‘චිහචිහාභිනදිතෙ [විහවිහාභිනදිතෙ (සී. ස්‍යා.)], සිප්පිකාභිරුතෙහි ච;

න මෙ තං ඵන්දති චිත්තං, එකත්තනිරතං හි මෙ’’ති.

… රාමණෙය්‍යකො ථෙරො….

50. ‘‘ධරණී ච සිඤ්චති වාති, මාලුතො විජ්ජුතා චරති නභෙ;

උපසමන්ති විතක්කා, චිත්තං සුසමාහිතං මමා’’ති.

… විමලො ථෙරො….

වග්ගො පඤ්චමො නිට්ඨිතො.

තස්සුද්දානං –

සිරීවඩ්ඪො රෙවතො ථෙරො, සුමඞ්ගලො සානුසව්හයො;

රමණීයවිහාරී ච, සමිද්ධිඋජ්ජයසඤ්ජයා;

රාමණෙය්‍යො ච සො ථෙරො, විමලො ච රණඤ්ජහොති.