3. තතියවග්ගො

21. ‘‘නාහං භයස්ස භායාමි, සත්ථා නො අමතස්ස කොවිදො;

යත්ථ භයං නාවතිට්ඨති, තෙන මග්ගෙන වජන්ති භික්ඛවො’’ති.

… නිග්‍රොධො ථෙරො….

22. ‘‘නීලා සුගීවා සිඛිනො, මොරා කාරම්භියං [කාරංවියං (සී.), කාරවියං (ස්‍යා.)] අභිනදන්ති;

තෙ සීතවාතකීළිතා [සීතවාතකද්දිතකලිතා (සී.), සීතවාතකලිතා (ස්‍යා.)], සුත්තං ඣායං [ඣානං (ස්‍යා.), ඣායිං (?)] නිබොධෙන්තී’’ති.

… චිත්තකො ථෙරො….

23. ‘‘අහං ඛො වෙළුගුම්බස්මිං, භුත්වාන මධුපායසං;

පදක්ඛිණං සම්මසන්තො, ඛන්ධානං උදයබ්බයං;

සානුං පටිගමිස්සාමි, විවෙකමනුබ්‍රූහය’’න්ති.

… ගොසාලො ථෙරො….

24. ‘‘අනුවස්සිකො පබ්බජිතො, පස්ස ධම්මසුධම්මතං;

තිස්සො විජ්ජා අනුප්පත්තා, කතං බුද්ධස්ස සාසන’’න්ති.

… සුගන්ධො ථෙරො….

25. ‘‘ඔභාසජාතං ඵලගං, චිත්තං යස්ස අභිණ්හසො;

තාදිසං භික්ඛුමාසජ්ජ, කණ්හ දුක්ඛං නිගච්ඡසී’’ති.

… නන්දියො ථෙරො….

26. ‘‘සුත්වා සුභාසිතං වාචං, බුද්ධස්සාදිච්චබන්ධුනො;

පච්චබ්‍යධිං හි නිපුණං, වාලග්ගං උසුනා යථා’’ති.

… අභයො ථෙරො….

27. ‘‘දබ්බං කුසං පොටකිලං, උසීරං මුඤ්ජපබ්බජං;

උරසා පනුදිස්සාමි, විවෙකමනුබ්‍රූහය’’න්ති.

… ලොමසකඞ්ගියො ථෙරො….

28. ‘‘කච්චි නො වත්ථපසුතො, කච්චි නො භූසනාරතො;

කච්චි සීලමයං ගන්ධං, කිං ත්වං වායසි [කච්චි සීලමයං ගන්ධං, ත්වං වාසි (ස්‍යා.)] නෙතරා පජා’’ති.

… ජම්බුගාමිකපුත්තො ථෙරො….

29. ‘‘සමුන්නමයමත්තානං, උසුකාරොව තෙජනං;

චිත්තං උජුං කරිත්වාන, අවිජ්ජං භින්ද හාරිතා’’ති.

… හාරිතො ථෙරො….

30. ‘‘ආබාධෙ මෙ සමුප්පන්නෙ, සති මෙ උදපජ්ජථ;

ආබාධො මෙ සමුප්පන්නො, කාලො මෙ නප්පමජ්ජිතු’’න්ති.

… උත්තියො ථෙරො….

වග්ගො තතියො නිට්ඨිතො.

තස්සුද්දානං –

නිග්‍රොධො චිත්තකො ථෙරො, ගොසාලථෙරො සුගන්ධො;

නන්දියො අභයො ථෙරො, ථෙරො ලොමසකඞ්ගියො;

ජම්බුගාමිකපුත්තො ච, හාරිතො උත්තියො ඉසීති.