8. මෙත්තසුත්තං
143. කරණීයමත්ථකුසලෙන, යන්ත සන්තං පදං අභිසමෙච්ච;
සක්කො උජූ ච සුහුජූ [සූජූ (සී.)] ච, සූවචො චස්ස මුදු අනතිමානී.
144. සන්තුස්සකො ච සුභරො ච, අප්පකිච්චො ච සල්ලහුකවුත්ති;
සන්තින්ද්‍රියො ච නිපකො ච, අප්පගබ්භො කුලෙස්වනනුගිද්ධො.
145. න ච ඛුද්දමාචරෙ කිඤ්චි, යෙන විඤ්ඤූ පරෙ උපවදෙය්‍යුං;
සුඛිනො ව ඛෙමිනො හොන්තු, සබ්බසත්තා [සබ්බෙ සත්තා (සී. ස්‍යා.)] භවන්තු සුඛිතත්තා.
146. යෙ කෙචි පාණභූතත්ථි, තසා වා ථාවරා වනවසෙසා;
දීඝා වා යෙ ව මහන්තා [මහන්ත (?)], මජ්ඣිමා රස්සකා අණුකථූලා.
147. දිට්ඨා වා යෙ ව අදිට්ඨා [අදිට්ඨ (?)], යෙ ව [යෙ ච (සී. ස්‍යා. කං. පී.)] දූරෙ වසන්ති අවිදූරෙ;
භූතා ව සම්භවෙසී ව [භූතා වා සම්භවෙසී වා (ස්‍යා. කං. පී. ක.)], සබ්බසත්තා භවන්තු සුඛිතත්තා.
148. න පරො පරං නිකුබ්බෙථ, නාතිමඤ්ඤෙථ කත්ථචි න කඤ්චි [නං කඤ්චි (සී. පී.), නං කිඤ්චි (ස්‍යා.), න කිඤ්චි (ක.)];
බ්‍යාරොසනා පටිඝසඤ්ඤා, නාඤ්ඤමඤ්ඤස්ස දුක්ඛමිච්ඡෙය්‍ය.
149. මාතා යථා නියං පුත්තමායුසා එකපුත්තමනුරක්ඛෙ;
එවම්පි සබ්බභූතෙසු, මානසං භාවයෙ අපරිමාණං.
150. මෙත්තඤ්ච සබ්බලොකස්මි, මානසං භාවයෙ අපරිමාණං;
උද්ධං අධො ච තිරියඤ්ච, අසම්බාධං අවෙරමසපත්තං.
151. තිට්ඨං චරං නිසින්නො ව [වා (සී. ස්‍යා. කං. පී.)], සයානො යාවතාස්ස විතමිද්ධො [විගතමිද්ධො (බහූසු)];
එතං සතිං අධිට්ඨෙය්‍ය, බ්‍රහ්මමෙතං විහාරමිධමාහු.
152. දිට්ඨිඤ්ච අනුපග්ගම්ම, සීලවා දස්සනෙන සම්පන්නො;
කාමෙසු විනය [විනෙය්‍ය (සී. ස්‍යා. පී.)] ගෙධං, න හි ජාතුග්ගබ්භසෙය්‍ය පුනරෙතීති.
මෙත්තසුත්තං අට්ඨමං නිට්ඨිතං.