9. හෙමවතසුත්තං

153. ‘‘අජ්ජ පන්නරසො උපොසථො, (ඉති සාතාගිරො යක්ඛො)

දිබ්බා [දිබ්‍යා (සී. ස්‍යා. කං. පී.)] රත්ති උපට්ඨිතා;

අනොමනාමං සත්ථාරං, හන්ද පස්සාම ගොතමං’’.

154. ‘‘කච්චි මනො සුපණිහිතො, (ඉති හෙමවතො යක්ඛො)

සබ්බභූතෙසු තාදිනො;

කච්චි ඉට්ඨෙ අනිට්ඨෙ ච, සඞ්කප්පස්ස වසීකතා’’.

155. ‘‘මනො චස්ස සුපණිහිතො, (ඉති සාතාගිරො යක්ඛො)

සබ්බභූතෙසු තාදිනො;

අථො ඉට්ඨෙ අනිට්ඨෙ ච, සඞ්කප්පස්ස වසීකතා’’.

156. ‘‘කච්චි අදින්නං නාදියති, (ඉති හෙමවතො යක්ඛො)

කච්චි පාණෙසු සඤ්ඤතො;

කච්චි ආරා පමාදම්හා, කච්චි ඣානං න රිඤ්චති’’.

157. ‘‘න සො අදින්නං ආදියති, (ඉති සාතාගිරො යක්ඛො)

අථො පාණෙසු සඤ්ඤතො;

අථො ආරා පමාදම්හා, බුද්ධො ඣානං න රිඤ්චති’’.

158. ‘‘කච්චි මුසා න භණති, (ඉති හෙමවතො යක්ඛො)

කච්චි න ඛීණබ්‍යප්පථො;

කච්චි වෙභූතියං නාහ, කච්චි සම්ඵං න භාසති’’.

159. ‘‘මුසා ච සො න භණති, (ඉති සාතාගිරො යක්ඛො)

අථො න ඛීණබ්‍යප්පථො;

අථො වෙභූතියං නාහ, මන්තා අත්ථං ච [අත්ථං සො (සී. පී. ක.)] භාසති’’.

160. ‘‘කච්චි න රජ්ජති කාමෙසු, (ඉති හෙමවතො යක්ඛො)

කච්චි චිත්තං අනාවිලං;

කච්චි මොහං අතික්කන්තො, කච්චි ධම්මෙසු චක්ඛුමා’’.

161. ‘‘න සො රජ්ජති කාමෙසු, (ඉති සාතාගිරො යක්ඛො)

අථො චිත්තං අනාවිලං;

සබ්බමොහං අතික්කන්තො, බුද්ධො ධම්මෙසු චක්ඛුමා’’.

162. ‘‘කච්චි විජ්ජාය සම්පන්නො, (ඉති හෙමවතො යක්ඛො )

කච්චි සංසුද්ධචාරණො;

කච්චිස්ස ආසවා ඛීණා, කච්චි නත්ථි පුනබ්භවො’’.

163. ‘‘විජ්ජාය චෙව සම්පන්නො, (ඉති සාතාගිරො යක්ඛො)

අථො සංසුද්ධචාරණො;

සබ්බස්ස ආසවා ඛීණා, නත්ථි තස්ස පුනබ්භවො’’.

164. ‘‘සම්පන්නං මුනිනො චිත්තං, කම්මුනා බ්‍යප්පථෙන ච;

විජ්ජාචරණසම්පන්නං, ධම්මතො නං පසංසති’’.

165. ‘‘සම්පන්නං මුනිනො චිත්තං, කම්මුනා බ්‍යප්පථෙන ච;

විජ්ජාචරණසම්පන්නං, ධම්මතො අනුමොදසි’’.

166. ‘‘සම්පන්නං මුනිනො චිත්තං, කම්මුනා බ්‍යප්පථෙන ච;

විජ්ජාචරණසම්පන්නං, හන්ද පස්සාම ගොතමං.

167. ‘‘එණිජඞ්ඝං කිසං වීරං [ධීරං (ස්‍යා.)], අප්පාහාරං අලොලුපං;

මුනිං වනස්මිං ඣායන්තං, එහි පස්සාම ගොතමං.

168. ‘‘සීහංවෙකචරං නාගං, කාමෙසු අනපෙක්ඛිනං;

උපසඞ්කම්ම පුච්ඡාම, මච්චුපාසප්පමොචනං.

169. ‘‘අක්ඛාතාරං පවත්තාරං, සබ්බධම්මාන පාරගුං;

බුද්ධං වෙරභයාතීතං, මයං පුච්ඡාම ගොතමං’’.

170. ‘‘කිස්මිං ලොකො සමුප්පන්නො, (ඉති හෙමවතො යක්ඛො)

කිස්මිං කුබ්බති සන්ථවං [සන්ධවං (ක.)];

කිස්ස ලොකො උපාදාය, කිස්මිං ලොකො විහඤ්ඤති’’.

171. ‘‘ඡසු [ඡස්සු (සී. පී.)] ලොකො සමුප්පන්නො, (හෙමවතාති භගවා)

ඡසු කුබ්බති සන්ථවං;

ඡන්නමෙව උපාදාය, ඡසු ලොකො විහඤ්ඤති’’.

172. ‘‘කතමං තං උපාදානං, යත්ථ ලොකො විහඤ්ඤති;

නිය්‍යානං පුච්ඡිතො බ්‍රූහි, කථං දුක්ඛා පමුච්චති’’ [පමුඤ්චති (ස්‍යා.)].

173. ‘‘පඤ්ච කාමගුණා ලොකෙ, මනොඡට්ඨා පවෙදිතා;

එත්ථ ඡන්දං විරාජෙත්වා, එවං දුක්ඛා පමුච්චති.

174. ‘‘එතං ලොකස්ස නිය්‍යානං, අක්ඛාතං වො යථාතථං;

එතං වො අහමක්ඛාමි, එවං දුක්ඛා පමුච්චති’’.

175. ‘‘කො සූධ තරති ඔඝං, කොධ තරති අණ්ණවං;

අප්පතිට්ඨෙ අනාලම්බෙ, කො ගම්භීරෙ න සීදති’’.

176. ‘‘සබ්බදා සීලසම්පන්නො, පඤ්ඤවා සුසමාහිතො;

අජ්ඣත්තචින්තී [අජ්ඣත්තසඤ්ඤී (ස්‍යා. කං. ක.)] සතිමා, ඔඝං තරති දුත්තරං.

177. ‘‘විරතො කාමසඤ්ඤාය, සබ්බසංයොජනාතිගො;

නන්දීභවපරික්ඛීණො, සො ගම්භීරෙ න සීදති’’.

178. ‘‘ගබ්භීරපඤ්ඤං නිපුණත්ථදස්සිං, අකිඤ්චනං කාමභවෙ අසත්තං;

තං පස්සථ සබ්බධි විප්පමුත්තං, දිබ්බෙ පථෙ කමමානං මහෙසිං.

179. ‘‘අනොමනාමං නිපුණත්ථදස්සිං, පඤ්ඤාදදං කාමාලයෙ අසත්තං;

තං පස්සථ සබ්බවිදුං සුමෙධං, අරියෙ පථෙ කමමානං මහෙසිං.

180. ‘‘සුදිට්ඨං වත නො අජ්ජ, සුප්පභාතං සුහුට්ඨිතං;

යං අද්දසාම සම්බුද්ධං, ඔඝතිණ්ණමනාසවං.

181. ‘‘ඉමෙ දසසතා යක්ඛා, ඉද්ධිමන්තො යසස්සිනො;

සබ්බෙ තං සරණං යන්ති, ත්වං නො සත්ථා අනුත්තරො.

182. ‘‘තෙ මයං විචරිස්සාම, ගාමා ගාමං නගා නගං;

නමස්සමානා සම්බුද්ධං, ධම්මස්ස ච සුධම්මත’’න්ති.

හෙමවතසුත්තං නවමං නිට්ඨිතං.