6. පරාභවසුත්තං

එවං මෙ සුතං – එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො අඤ්ඤතරා දෙවතා අභික්කන්තාය රත්තියා අභික්කන්තවණ්ණා කෙවලකප්පං ජෙතවනං ඔභාසෙත්වා යෙන භගවා තෙනුපසඞ්කමි; උපසඞ්කමිත්වා භගවන්තං අභිවාදෙත්වා එකමන්තං අට්ඨාසි. එකමන්තං ඨිතා ඛො සා දෙවතා භගවන්තං ගාථාය අජ්ඣභාසි –

91. ‘‘පරාභවන්තං පුරිසං, මයං පුච්ඡාම ගොතම [ගොතමං (සී. ස්‍යා.)];

භගවන්තං [භවන්තං (ස්‍යා. ක.)] පුට්ඨුමාගම්ම, කිං පරාභවතො මුඛං’’.

92. ‘‘සුවිජානො භවං හොති, සුවිජානො [දුවිජානො (ස්‍යා. ක.)] පරාභවො;

ධම්මකාමො භවං හොති, ධම්මදෙස්සී පරාභවො’’.

93. ‘‘ඉති හෙතං විජානාම, පඨමො සො පරාභවො;

දුතියං භගවා බ්‍රූහි, කිං පරාභවතො මුඛං’’.

94. ‘‘අසන්තස්ස පියා හොන්ති, සන්තෙ න කුරුතෙ පියං;

අසතං ධම්මං රොචෙති, තං පරාභවතො මුඛං’’.

95. ‘‘ඉති හෙතං විජානාම, දුතියො සො පරාභවො;

තතියං භගවා බ්‍රූහි, කිං පරාභවතො මුඛං’’.

96. ‘‘නිද්දාසීලී සභාසීලී, අනුට්ඨාතා ච යො නරො;

අලසො කොධපඤ්ඤාණො, තං පරාභවතො මුඛං’’.

97. ‘‘ඉති හෙතං විජානාම, තතියො සො පරාභවො;

චතුත්ථං භගවා බ්‍රූහි, කිං පරාභවතො මුඛං’’.

98. ‘‘යො මාතරං [යො මාතරං වා (සී. ස්‍යා. කං. පී.)] පිතරං වා, ජිණ්ණකං ගතයොබ්බනං;

පහු සන්තො න භරති, තං පරාභවතො මුඛං’’.

99. ‘‘ඉති හෙතං විජානාම, චතුත්ථො සො පරාභවො;

පඤ්චමං භගවා බ්‍රූහි, කිං පරාභවතො මුඛං’’.

100. ‘‘යො බ්‍රාහ්මණං [යො බ්‍රාහ්මණං වා (සී. ස්‍යා. කං. පී.)] සමණං වා, අඤ්ඤං වාපි වනිබ්බකං;

මුසාවාදෙන වඤ්චෙති, තං පරාභවතො මුඛං’’.

101. ‘‘ඉති හෙතං විජානාම, පඤ්චමො සො පරාභවො;

ඡට්ඨමං භගවා බ්‍රූහි, කිං පරාභවතො මුඛං’’.

102. ‘‘පහූතවිත්තො පුරිසො, සහිරඤ්ඤො සභොජනො;

එකො භුඤ්ජති සාදූනි, තං පරාභවතො මුඛං’’.

103. ‘‘ඉති හෙතං විජානාම, ඡට්ඨමො සො පරාභවො;

සත්තමං භගවා බ්‍රූහි, කිං පරාභවතො මුඛං’’.

104. ‘‘ජාතිත්ථද්ධො ධනත්ථද්ධො, ගොත්තත්ථද්ධො ච යො නරො;

සඤ්ඤාතිං අතිමඤ්ඤෙති, තං පරාභවතො මුඛං’’.

105. ‘‘ඉති හෙතං විජානාම, සත්තමො සො පරාභවො;

අට්ඨමං භගවා බ්‍රූහි, කිං පරාභවතො මුඛං’’.

106. ‘‘ඉත්ථිධුත්තො සුරාධුත්තො, අක්ඛධුත්තො ච යො නරො;

ලද්ධං ලද්ධං විනාසෙති, තං පරාභවතො මුඛං’’.

107. ‘‘ඉති හෙතං විජානාම, අට්ඨමො සො පරාභවො;

නවමං භගවා බ්‍රූහි, කිං පරාභවතො මුඛං’’.

108. ‘‘සෙහි දාරෙහි අසන්තුට්ඨො [දාරෙහ්‍යසන්තුට්ඨො (ක.)], වෙසියාසු පදුස්සති [පදිස්සති (සී.)];

දුස්සති [දිස්සති (සී. පී.)] පරදාරෙසු, තං පරාභවතො මුඛං’’.

109. ‘‘ඉති හෙතං විජානාම, නවමො සො පරාභවො;

දසමං භගවා බ්‍රූහි, කිං පරාභවතො මුඛං’’.

110. ‘‘අතීතයොබ්බනො පොසො, ආනෙති තිම්බරුත්ථනිං;

තස්සා ඉස්සා න සුපති, තං පරාභවතො මුඛං’’.

111. ‘‘ඉති හෙතං විජානාම, දසමො සො පරාභවො;

එකාදසමං භගවා බ්‍රූහි, කිං පරාභවතො මුඛං’’.

112. ‘‘ඉත්ථිං සොණ්ඩිං විකිරණිං, පුරිසං වාපි තාදිසං;

ඉස්සරියස්මිං ඨපෙති [ඨාපෙති (සී. පී.), ථපෙති (ක.)], තං පරාභවතො මුඛං’’.

113. ‘‘ඉති හෙතං විජානාම, එකාදසමො සො පරාභවො;

ද්වාදසමං භගවා බ්‍රූහි, කිං පරාභවතො මුඛං’’.

114. ‘‘අප්පභොගො මහාතණ්හො, ඛත්තියෙ ජායතෙ කුලෙ;

සො ච රජ්ජං පත්ථයති, තං පරාභවතො මුඛං’’.

115. ‘‘එතෙ පරාභවෙ ලොකෙ, පණ්ඩිතො සමවෙක්ඛිය;

අරියො දස්සනසම්පන්නො, ස ලොකං භජතෙ සිව’’න්ති.

පරාභවසුත්තං ඡට්ඨං නිට්ඨිතං.