5. චුන්දසුත්තං

83. ‘‘පුච්ඡාමි මුනිං පහූතපඤ්ඤං, (ඉති චුන්දො කම්මාරපුත්තො)

බුද්ධං ධම්මස්සාමිං වීතතණ්හං;

ද්විපදුත්තමං [දිපදුත්තමං (සී. ස්‍යා. කං. පී.)] සාරථීනං පවරං, කති ලොකෙ සමණා තදිඞ්ඝ බ්‍රූහි’’.

84. ‘‘චතුරො සමණා න පඤ්චමත්ථි, (චුන්දාති භගවා)

තෙ තෙ ආවිකරොමි සක්ඛිපුට්ඨො;

මග්ගජිනො මග්ගදෙසකො ච, මග්ගෙ ජීවති යො ච මග්ගදූසී’’.

85. ‘‘කං මග්ගජිනං වදන්ති බුද්ධා, (ඉති චුන්දො කම්මාරපුත්තො)

මග්ගක්ඛායී කථං අතුල්‍යො හොති;

මග්ගෙ ජීවති මෙ බ්‍රූහි පුට්ඨො, අථ මෙ ආවිකරොහි මග්ගදූසිං’’ [මග්ගදූසී (ක.)].

86. ‘‘යො තිණ්ණකථංකථො විසල්ලො, නිබ්බානාභිරතො අනානුගිද්ධො;

ලොකස්ස සදෙවකස්ස නෙතා, තාදිං මග්ගජිනං වදන්ති බුද්ධා.

87. ‘‘පරමං පරමන්ති යොධ ඤත්වා, අක්ඛාති විභජතෙ ඉධෙව ධම්මං;

තං කඞ්ඛඡිදං මුනිං අනෙජං, දුතියං භික්ඛුනමාහු මග්ගදෙසිං.

88. ‘‘යො ධම්මපදෙ සුදෙසිතෙ, මග්ගෙ ජීවති සඤ්ඤතො සතීමා;

අනවජ්ජපදානි සෙවමානො, තතියං භික්ඛුනමාහු මග්ගජීවිං.

89. ‘‘ඡදනං කත්වාන සුබ්බතානං, පක්ඛන්දී කුලදූසකො පගබ්භො;

මායාවී අසඤ්ඤතො පලාපො, පතිරූපෙන චරං ස මග්ගදූසී.

90. ‘‘එතෙ ච පටිවිජ්ඣි යො ගහට්ඨො, සුතවා අරියසාවකො සපඤ්ඤො;

සබ්බෙ නෙතාදිසාති [සබ්බෙ නෙ තාදිසාති (සී. ස්‍යා. පී.)] ඤත්වා, ඉති දිස්වා න හාපෙති තස්ස සද්ධා;

කථං හි දුට්ඨෙන අසම්පදුට්ඨං, සුද්ධං අසුද්ධෙන සමං කරෙය්‍යා’’ති.

චුන්දසුත්තං පඤ්චමං නිට්ඨිතං.