12. මුනිසුත්තං

209. සන්ථවාතො [සන්ධවතො (ක.)] භයං ජාතං, නිකෙතා ජායතෙ රජො;

අනිකෙතමසන්ථවං, එතං වෙ මුනිදස්සනං.

210. යො ජාතමුච්ඡිජ්ජ න රොපයෙය්‍ය, ජායන්තමස්ස නානුප්පවෙච්ඡෙ;

තමාහු එකං මුනිනං චරන්තං, අද්දක්ඛි සො සන්තිපදං මහෙසි.

211. සඞ්ඛාය වත්ථූනි පමාය [පහාය (ක. සී. ක.), සමාය (ක.) ප + මී + ත්වා = පමාය, යථා නිස්සායාතිපදං] බීජං, සිනෙහමස්ස නානුප්පවෙච්ඡෙ;

ස වෙ මුනී ජාතිඛයන්තදස්සී, තක්කං පහාය න උපෙති සඞ්ඛං.

212. අඤ්ඤාය සබ්බානි නිවෙසනානි, අනිකාමයං අඤ්ඤතරම්පි තෙසං;

ස වෙ මුනී වීතගෙධො අගිද්ධො, නායූහතී පාරගතො හි හොති.

213. සබ්බාභිභුං සබ්බවිදුං සුමෙධං, සබ්බෙසු ධම්මෙසු අනූපලිත්තං;

සබ්බඤ්ජහං තණ්හක්ඛයෙ විමුත්තං, තං වාපි ධීරා මුනි [මුනිං (සී. පී.)] වෙදයන්ති.

214. පඤ්ඤාබලං සීලවතූපපන්නං, සමාහිතං ඣානරතං සතීමං;

සඞ්ගා පමුත්තං අඛිලං අනාසවං, තං වාපි ධීරා මුනි වෙදයන්ති.

215. එකං චරන්තං මුනිමප්පමත්තං, නින්දාපසංසාසු අවෙධමානං;

සීහංව සද්දෙසු අසන්තසන්තං, වාතංව ජාලම්හි අසජ්ජමානං;

පද්මංව [පදුමංව (සී. ස්‍යා. පී.)] තොයෙන අලිප්පමානං [අලිම්පමානං (ස්‍යා. ක.)], නෙතාරමඤ්ඤෙසමනඤ්ඤනෙය්‍යං;

තං වාපි ධීරා මුනි වෙදයන්ති.

216. යො ඔගහණෙ ථම්භොරිවාභිජායති, යස්මිං පරෙ වාචාපරියන්තං [වාචං පරියන්තං (ක.)] වදන්ති;

තං වීතරාගං සුසමාහිතින්ද්‍රියං, තං වාපි ධීරා මුනි වෙදයන්ති.

217. යො වෙ ඨිතත්තො තසරංව උජ්ජු, ජිගුච්ඡති කම්මෙහි පාපකෙහි;

වීමංසමානො විසමං සමඤ්ච, තං වාපි ධීරා මුනි වෙදයන්ති.

218. යො සඤ්ඤතත්තො න කරොති පාපං, දහරො මජ්ඣිමො ච මුනි [දහරො ච මජ්ඣො ච මුනී (සී. ස්‍යා. කං. පී.)] යතත්තො;

අරොසනෙය්‍යො න සො රොසෙති කඤ්චි [න රොසෙති (ස්‍යා.)], තං වාපි ධීරා මුනි වෙදයන්ති.

219. යදග්ගතො මජ්ඣතො සෙසතො වා, පිණ්ඩං ලභෙථ පරදත්තූපජීවී;

නාලං ථුතුං නොපි නිපච්චවාදී, තං වාපි ධීරා මුනි වෙදයන්ති.

220. මුනිං චරන්තං විරතං මෙථුනස්මා, යො යොබ්බනෙ නොපනිබජ්ඣතෙ ක්වචි;

මදප්පමාදා විරතං විප්පමුත්තං, තං වාපි ධීරා මුනි වෙදයන්ති.

221. අඤ්ඤාය ලොකං පරමත්ථදස්සිං, ඔඝං සමුද්දං අතිතරිය තාදිං;

තං ඡින්නගන්ථං අසිතං අනාසවං, තං වාපි ධීරා මුනි වෙදයන්ති.

222. අසමා උභො දූරවිහාරවුත්තිනො, ගිහී [ගිහි (ක.)] දාරපොසී අමමො ච සුබ්බතො;

පරපාණරොධාය ගිහී අසඤ්ඤතො, නිච්චං මුනී රක්ඛති පාණිනෙ [පාණිනො (සී.)] යතො.

223. සිඛී යථා නීලගීවො [නීලගිවො (ස්‍යා.)] විහඞ්ගමො, හංසස්ස නොපෙති ජවං කුදාචනං;

එවං ගිහී නානුකරොති භික්ඛුනො, මුනිනො විවිත්තස්ස වනම්හි ඣායතොති.

මුනිසුත්තං ද්වාදසමං නිට්ඨිතං.

උරගවග්ගො පඨමො නිට්ඨිතො.