11. විජයසුත්තං

195. චරං වා යදි වා තිට්ඨං, නිසින්නො උද වා සයං;

සමිඤ්ජෙති පසාරෙති, එසා කායස්ස ඉඤ්ජනා.

196. අට්ඨිනහාරුසංයුත්තො, තචමංසාවලෙපනො;

ඡවියා කායො පටිච්ඡන්නො, යථාභූතං න දිස්සති.

197. අන්තපූරො උදරපූරො, යකනපෙළස්ස [යකපෙළස්ස (සී. ස්‍යා.)] වත්ථිනො;

හදයස්ස පප්ඵාසස්ස, වක්කස්ස පිහකස්ස ච.

198. සිඞ්ඝාණිකාය ඛෙළස්ස, සෙදස්ස ච මෙදස්ස ච;

ලොහිතස්ස ලසිකාය, පිත්තස්ස ච වසාය ච.

199. අථස්ස නවහි සොතෙහි, අසුචී සවති සබ්බදා;

අක්ඛිම්හා අක්ඛිගූථකො, කණ්ණම්හා කණ්ණගූථකො.

200. සිඞ්ඝාණිකා ච නාසතො, මුඛෙන වමතෙකදා;

පිත්තං සෙම්හඤ්ච වමති, කායම්හා සෙදජල්ලිකා.

201. අථස්ස සුසිරං සීසං, මත්ථලුඞ්ගස්ස පූරිතං;

සුභතො නං මඤ්ඤති, බාලො අවිජ්ජාය පුරක්ඛතො.

202. යදා ච සො මතො සෙති, උද්ධුමාතො විනීලකො;

අපවිද්ධො සුසානස්මිං, අනපෙක්ඛා හොන්ති ඤාතයො.

203. ඛාදන්ති නං සුවානා [සුපාණා (පී.)] ච, සිඞ්ගාලා [සිගාලා (සී. ස්‍යා. කං. පී.)] වකා කිමී;

කාකා ගිජ්ඣා ච ඛාදන්ති, යෙ චඤ්ඤෙ සන්ති පාණිනො.

204. සුත්වාන බුද්ධවචනං, භික්ඛු පඤ්ඤාණවා ඉධ;

සො ඛො නං පරිජානාති, යථාභූතඤ්හි පස්සති.

205. යථා ඉදං තථා එතං, යථා එතං තථා ඉදං;

අජ්ඣත්තඤ්ච බහිද්ධා ච, කායෙ ඡන්දං විරාජයෙ.

206. ඡන්දරාගවිරත්තො සො, භික්ඛු පඤ්ඤාණවා ඉධ;

අජ්ඣගා අමතං සන්තිං, නිබ්බානං පදමච්චුතං.

207. ද්විපාදකොයං [දිපාදකොයං (සී. ස්‍යා. කං. පී.)] අසුචි, දුග්ගන්ධො පරිහාරති [පරිහීරති (සී. ස්‍යා. කං. පී.)];

නානාකුණපපරිපූරො, විස්සවන්තො තතො තතො.

208. එතාදිසෙන කායෙන, යො මඤ්ඤෙ උණ්ණමෙතවෙ [උන්නමෙතවෙ (?)];

පරං වා අවජානෙය්‍ය, කිමඤ්ඤත්‍ර අදස්සනාති.

විජයසුත්තං එකාදසමං නිට්ඨිතං.