1. උරගසුත්තං

1. යො [යො වෙ (ස්‍යා.)] උප්පතිතං විනෙති කොධං, විසටං සප්පවිසංව ඔසධෙහි [ඔසධෙභි (ක.)];

සො භික්ඛු ජහාති ඔරපාරං, උරගො ජිණ්ණමිවත්තචං [ජිණ්ණමිව තචං (සී. ස්‍යා. කං. පී.), ජිණ්ණමිවා තචං (?)] පුරාණං.

2. යො රාගමුදච්ඡිදා අසෙසං, භිසපුප්ඵංව සරොරුහං [සරෙරුහං (ක.)] විගය්හ;

සො භික්ඛු ජහාති ඔරපාරං, උරගො ජිණ්ණමිවත්තචං, පුරාණං.

3. යො තණ්හමුදච්ඡිදා අසෙසං, සරිතං සීඝසරං විසොසයිත්වා;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

4. යො මානමුදබ්බධී අසෙසං, නළසෙතුංව සුදුබ්බලං මහොඝො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

5. යො නාජ්ඣගමා භවෙසු සාරං, විචිනං පුප්ඵමිව [පුප්ඵමිව (බහූසු)] උදුම්බරෙසු;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

6. යස්සන්තරතො න සන්ති කොපා, ඉතිභවාභවතඤ්ච [ඉතිබ්භවාභවතඤ්ච (ක.)] වීතිවත්තො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

7. යස්ස විතක්කා විධූපිතා, අජ්ඣත්තං සුවිකප්පිතා අසෙසා;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

8. යො නාච්චසාරී න පච්චසාරී, සබ්බං අච්චගමා ඉමං පපඤ්චං;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

9. යො නාච්චසාරී න පච්චසාරී, සබ්බං විතථමිදන්ති ඤත්වා [උත්වා (ස්‍යා. පී. ක.)] ලොකෙ;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

10. යො නාච්චසාරී න පච්චසාරී, සබ්බං විතථමිදන්ති වීතලොභො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

11. යො නාච්චසාරී න පච්චසාරී, සබ්බං විතථමිදන්ති වීතරාගො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

12. යො නාච්චසාරී න පච්චසාරී, සබ්බං විතථමිදන්ති වීතදොසො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

13. යො නාච්චසාරී න පච්චසාරී, සබ්බං විතථමිදන්ති වීතමොහො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

14. යස්සානුසයා න සන්ති කෙචි, මූලා ච අකුසලා සමූහතාසෙ;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

15. යස්ස දරථජා න සන්ති කෙචි, ඔරං ආගමනාය පච්චයාසෙ;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

16. යස්ස වනථජා න සන්ති කෙචි, විනිබන්ධාය භවාය හෙතුකප්පා;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

17. යො නීවරණෙ පහාය පඤ්ච, අනිඝො තිණ්ණකථංකථො විසල්ලො;

සො භික්ඛු ජහාති ඔරපාරං, උරගො ජිණ්ණමිවත්තචං පුරාණං.

උරගසුත්තං පඨමං නිට්ඨිතං.