2. ධනියසුත්තං

18. ‘‘පක්කොදනො දුද්ධඛීරොහමස්මි, (ඉති ධනියො ගොපො)

අනුතීරෙ මහියා සමානවාසො;

ඡන්නා කුටි ආහිතො ගිනි, අථ චෙ පත්ථයසී පවස්ස දෙව’’.

19. ‘‘අක්කොධනො විගතඛිලොහමස්මි [විගතඛීලොහමස්මි (සී. පී.)], (ඉති භගවා)

අනුතීරෙ මහියෙකරත්තිවාසො;

විවටා කුටි නිබ්බුතො ගිනි, අථ චෙ පත්ථයසී පවස්ස දෙව’’.

20. ‘‘අන්ධකමකසා න විජ්ජරෙ, (ඉති ධනියො ගොපො)

කච්ඡෙ රූළ්හතිණෙ චරන්ති ගාවො;

වුට්ඨිම්පි සහෙය්‍යුමාගතං, අථ චෙ පත්ථයසී පවස්ස දෙව’’.

21. ‘‘බද්ධාසි භිසී සුසඞ්ඛතා, (ඉති භගවා)

තිණ්ණො පාරගතො විනෙය්‍ය ඔඝං;

අත්ථො භිසියා න විජ්ජති, අථ චෙ පත්ථයසී පවස්ස දෙව’’.

22. ‘‘ගොපී මම අස්සවා අලොලා, (ඉති ධනියො ගොපො)

දීඝරත්තං [දීඝරත්ත (ක.)] සංවාසියා මනාපා;

තස්සා න සුණාමි කිඤ්චි පාපං, අථ චෙ පත්ථයසී පවස්ස දෙව’’.

23. ‘‘චිත්තං මම අස්සවං විමුත්තං, (ඉති භගවා)

දීඝරත්තං පරිභාවිතං සුදන්තං;

පාපං පන මෙ න විජ්ජති, අථ චෙ පත්ථයසී පවස්ස දෙව’’.

24. ‘‘අත්තවෙතනභතොහමස්මි, (ඉති ධනියො ගොපො)

පුත්තා ච මෙ සමානියා අරොගා;

තෙසං න සුණාමි කිඤ්චි පාපං, අථ චෙ පත්ථයසී පවස්ස දෙව’’.

25. ‘‘නාහං භතකොස්මි කස්සචි, (ඉති භගවා)

නිබ්බිට්ඨෙන චරාමි සබ්බලොකෙ;

අත්ථො භතියා න විජ්ජති, අථ චෙ පත්ථයසී පවස්ස දෙව’’.

26. ‘‘අත්ථි වසා අත්ථි ධෙනුපා, (ඉති ධනියො ගොපො)

ගොධරණියො පවෙණියොපි අත්ථි;

උසභොපි ගවම්පතීධ අත්ථි, අථ චෙ පත්ථයසී පවස්ස දෙව’’.

27. ‘‘නත්ථි වසා නත්ථි ධෙනුපා, (ඉති භගවා)

ගොධරණියො පවෙණියොපි නත්ථි;

උසභොපි ගවම්පතීධ නත්ථි, අථ චෙ පත්ථයසී පවස්ස දෙව’’.

28. ‘‘ඛිලා නිඛාතා අසම්පවෙධී, (ඉති ධනියො ගොපො)

දාමා මුඤ්ජමයා නවා සුසණ්ඨානා;

න හි සක්ඛින්ති ධෙනුපාපි ඡෙත්තුං [ඡෙතුං (ක.)], අථ චෙ පත්ථයසී පවස්ස දෙව’’.

29. ‘‘උසභොරිව ඡෙත්ව [ඡෙත්වා (ස්‍යා. ක.)] බන්ධනානි, (ඉති භගවා)

නාගො පූතිලතංව දාලයිත්වා [පූතිලතං පදාලයිත්වා (ස්‍යා. ක.)];

නාහං පුනුපෙස්සං [පුන උපෙස්සං (සී. ස්‍යා. කං. පී.), පුනුපෙය්‍ය (ක.)] ගබ්භසෙය්‍යං, අථ චෙ පත්ථයසී පවස්ස දෙව’’.

30. ‘‘නින්නඤ්ච ථලඤ්ච පූරයන්තො, මහාමෙඝො පවස්සි තාවදෙව;

සුත්වා දෙවස්ස වස්සතො, ඉමමත්ථං ධනියො අභාසථ.

31. ‘‘ලාභා වත නො අනප්පකා, යෙ මයං භගවන්තං අද්දසාම;

සරණං තං උපෙම චක්ඛුම, සත්ථා නො හොහි තුවං මහාමුනි.

32. ‘‘ගොපී ච අහඤ්ච අස්සවා, බ්‍රහ්මචරියං [බ්‍රහ්මචරිය (ක.)] සුගතෙ චරාමසෙ;

ජාතිමරණස්ස පාරගූ [පාරගා (සී. ස්‍යා. කං. පී.)], දුක්ඛස්සන්තකරා භවාමසෙ’’.

33. ‘‘නන්දති පුත්තෙහි පුත්තිමා, (ඉති මාරො පාපිමා)

ගොමා [ගොමිකො (සී. පී.), ගොපිකො (ස්‍යා. කං.), ගොපියො (ක.)] ගොහි තථෙව නන්දති;

උපධී හි නරස්ස නන්දනා, න හි සො නන්දති යො නිරූපධි’’.

34. ‘‘සොචති පුත්තෙහි පුත්තිමා, (ඉති භගවා)

ගොපියො ගොහි තථෙව සොචති;

උපධී හි නරස්ස සොචනා, න හි සො සොචති යො නිරූපධී’’ති.

ධනියසුත්තං දුතියං නිට්ඨිතං.